देशभरामधील इंधनाचे दर आज पुन्हा वाढवण्यात आले आहेत. मागील काही दिवसांपासून सुरु असणारा दरवाढीमध्ये आज पुन्हा एकदा नव्याने भर पडली आहे. देशभरामध्ये आज इंधनाचे दर प्रति लिटरमागे ८० पैशांनी वाढले आहे. विशेष म्हणजे या दरवाढीमुळे आतापर्यंत १०० रुपये लिटरच्या आत असणाऱ्या डिझेलच्या दरांनी मुंबईमध्ये १०० चा टप्पा ओलांडलाय.
नक्की वाचा >> पेट्रोल भरण्यासाठी महाराष्ट्रातील नागरिक गुजरातमध्ये; दरांमधील फरक पाहून तुम्हालाही वाटेल आश्चर्य
देशासहीत मुंबईमध्येही मागील नऊ दिवसांमधील आठव्यांदा झालेली दरवाढ असून पेट्रोल आणि डिझेलचे दर आज प्रति लिटर ८० पैशांनी वाढले आहेत. त्यामुळेच मुंबईत आता पेट्रोल ११५.८८ रुपये लिटर तर डिझेल १००.१० रुपये लिटर दराने मिळत आहे. नऊ दिवसांमध्ये इंधनाचे दर लिटरमागे ५ रुपये ६० पैशांनी वाढल्याचं पीटीआय या वृत्तसंस्थेनं म्हटलंय.
कालच पेट्रोलच्या दरात ८० पैसे आणि डिझेलच्या दरात ७० पैशांची वाढ करण्यात आल्याने या देशभरातील मोठ्या शहरात पेट्रोलच्या दर १०० रुपयांच्या पुढे गेल्याचं पहायला मिळालं होतं. काल पहिल्यांदा दिल्लीत पेट्रोलचा दर १००.२१ रुपये प्रति लिटर झाला. यात आता ८० पैशांनी भर पडल्याने दिल्लीत एक लिटर पेट्रोल १०१.०१ रुपयांना मिळत आहे.
नक्की वाचा >> विश्लेषण : कर आकारण्यात महाराष्ट्र देशात नंबर वन; १०० रुपयांचं पेट्रोल भरल्यास किती कर आकारतात माहितीये का?
देशभरात इंधन दरवाढ सुरूच आहे. त्यामुळे सर्वसामान्यांच्या खिशाला मोठी झळ बसत आहे. विशेष म्हणजे देशातील ५ राज्यांच्या विधानसभा निवडणुकांच्या पार्श्वभूमीवर नोव्हेंबर २०२१ पासून इंधन दरवाढ करण्यात आली नव्हती. या काळात कच्चा तेलाच्या किमतीत प्रति बॅरल ३० डॉलरची वाढ झाली होती. मात्र, आता निवडणूक निकालानंतर इंधन दरवाढीचा भडका उडताना दिसत आहे.