माजी पंतप्रधान मनमोहन सिंग यांचं स्मारक कुठे उभारलं जाणार? भूखंड निश्चित; कुटुंबाकडून मंजुरी

दरम्यान, उपिंदर सिंग यांनी या वृत्ताला दुजोरा दिला आहे. त्या म्हणाल्या, “हा भूखंड एका ट्रस्टकडे सोपवला जाणार आहे. तिथे लवकरच स्मारक उभारलं जाईल. स्मारकाच्या बांधकामासाठी आम्ही सरकारकडे २५ लाख रुपयांपर्यंत अनुदान मागू शकतो, असं यासंबंधीच्या नियमांत म्हटलं आहे. सरकारने जमीन निवडली असून आमच्या कुटुंबाने त्या भूखंडाला मंजुरी दिली आहे.”

कुठे असणार मनमोहन सिंग यांचं स्मारक?

मनमोहन सिंग यांच्या स्मृतीस्थळासाठी जो भूखंड देण्यात आला आहे त्या भूखंडाच्या समोर माजी पंतप्रधान चंद्रशेखर यांचं स्मृतीस्थळ आहे. मागील बाजूस माजी राष्ट्रपती आर. वेंकटरमण यांचं तर उजव्या-डाव्या बाजूला दोन माजी राष्ट्रपती ज्ञानी झैल सिंग व प्रणव मुखर्जी यांचं स्मृती स्थळ आहे.

मनमोहन सिंह यांच्या स्मारकासाठी दिल्लीमधील एकता स्थळ आणि विजय घाट येथील जागा सरकारने सुरुवातीला सूचवल्या होत्या. याबाबत केंद्रीय गृहमंत्रालय, गृहनिर्माण आणि नगरविकास मंत्रालयाच्या वरिष्ठ अधिकाऱ्यांची बैठकही झाली होती. मात्र, नंतर आणखी काही पर्याय देण्यात आले. त्यातून सिंग यांच्या कुटुंबाने राजघाटाजवळ राष्ट्रीय स्मृती स्थळ परिसरातील ९०० चौरस मीटरच्या भूखंडास मंजुरी दिली आहे.

मनमोहन सिंग यांचे २६ डिसेंबर रोजी निधन झाले. त्यानंतर काही दिवसांनी काँग्रेसने त्यांच्या स्मारकाची मागणी केली होती. ही मागणी केंद्र सरकारने मान्य केली आहे.