Donald Trump Tariffs And Trade Deal With India: अमेरिकेचे राष्ट्राध्यक्ष डोनाल्ड ट्रम्प यांनी म्हटले आहे की, जोपर्यंत भारतासोबतचा टॅरिफचा वाद मिटत नाही, तोपर्यंत व्यापार करारावर कोणतीही चर्चा होणार नाही. दरम्यान, डोनाल्ड ट्रम्प यांनी आधीच लादलेल्या २५% टॅरिफ व्यतिरिक्त भारतावर अतिरिक्त २५% टॅरिफ लादला आहे. अशा प्रकारे, भारतावर एकूण ५०% टॅरिफ लादण्यात आला आहे. यातील २५% टॅरिफ ७ ऑगस्टपासून लागू झाला आहे आणि उर्वरित २५% टॅरिफ २७ ऑगस्टपासून लागू होईल.
५०% टॅरिफच्या मुद्द्यादरम्यान व्यापार कराराची चर्चा पुन्हा सुरू होईल, अशी अपेक्षा आहे का, असे वृत्तसंस्था एएनआयने डोनाल्ड ट्रम्प यांना विचारले असता, त्यांनी उत्तर दिले, “नाही, जोपर्यंत हा प्रश्न सुटत नाही तोपर्यंत नाही.”
मोदींनी ट्रम्प यांना उत्तर दिले
गेल्या काही दिवसांपासून डोनाल्ड ट्रम्प सातत्याने भारताविरोधात आक्रमक भाषा वापरत आहेत. याला आता भारतानेही त्यांच्याच भाषेत उत्तर दिले आहे. पंतप्रधान नरेंद्र मोदी यांनी गुरुवारी अमेरिकेच्या टॅरिफचा उल्लेख न करता डोनाल्ड ट्रम्प यांना थेट संदेश दिला. पंतप्रधान म्हणाले की, आमचे शेतकरी, पशुपालक आणि मच्छीमारांचे हित हे आमचे सर्वोच्च प्राधान्य आहे आणि ते त्यांच्या हितांशी तडजोड करणार नाहीत.
अमेरिकेला हवा आहे कृषी बाजारपेठेत प्रवेश
डोनाल्ड ट्रम्प यांना भारताने अमेरिकेसाठी शेती आणि दुग्धजन्य बाजारपेठ खुली करावी, अशी इच्छा आहे, पण भारताने लाखो लोकांच्या रोजीरोटीचा प्रश्न असल्याचे म्हणत कृषी आणि दुग्धजन्य पदार्थांसारखे महत्त्वाचे क्षेत्र आंतरराष्ट्रीय बाजारपेठेसाठी खुले करण्यास विरोध केला आहे.
आता हे स्पष्ट झाले आहे की, ऑगस्टच्या सुरुवातीला अंतिम होणारा भारत आणि अमेरिकेतील व्यापार करार आता होणार नाही.
ट्रम्प अचानक का बदलले?
काही महिन्यांपूर्वीपर्यंत भारताशी चांगले संबंध असलेले आणि पंतप्रधान नरेंद्र मोदी यांना त्यांचे मित्र मानणारे अमेरिकेचे राष्ट्राध्यक्ष डोनाल्ड ट्रम्प अचानक इतके का बदलले आहेत, हे समजणे खूप कठीण आहे. ट्रम्प भारत रशियाकडून तेल खरेदी करत आहे, असे निमित्त काढत आहेत. परंतु अमेरिका स्वतःही रशियाकडून बरीच उत्पादने खरेदी करते, या वस्तुस्थितीचे त्यांच्याकडे उत्तर नाही. पण, भारतानेही आपली भूमिका स्पष्ट केली आहे आणि म्हटले आहे की, भारत अमेरिकेसमोर झुकणार नाही.