युवा रॅपस्टारमुळे केरळच्या राजकारणात द्वंद्व? माकप विरुद्ध भाजप संघर्षात ठिणगी!

कार्यक्रमात आकर्षणाचे केंद्र

हे वाद असतानाही पलक्कड येथील कार्यक्रमात त्याची लोकप्रियता दिसून आली. उपस्थितांनी समारंभस्थळी मंचावर असलेल्या अनेक ज्येष्ठ मंत्र्यांकडे दुर्लक्ष करत वेदनबरोबर गाण्यावर ठेका धरण्यासाठी धाव घेतली. अखेर जमावाला नियंत्रित करण्यासाठी पोलिसांना लाठीमार करावा लागला. वेदनने गाण्यातून हिंदुत्ववाद्यांवर टीका केली. त्रिचूर येथे जन्मलेल्या वेदनचे मूळ नाव हिरेन दास मुरली. उपेक्षितांची वेदना गाण्यातून मांडल्याने तो लोकप्रिय झाला. त्याची आई श्रीलंकन निर्वासित आहे. तर वडील दलित. आपल्या आईला जे जीवनात सहन करावे लागले ते संगीतातून शब्दबद्ध करण्याचा त्याचा प्रयत्न असतो. उजव्या विचारसरणीच्या राजकारणावर तो टीकास्त्र सोडतो. त्यामुळे माकपच्या कार्यक्रमाचा तो केंद्रबिंदू होता. वेदन हा वाट चुकलेला युवक असून, तो जिहादींच्या हातातील बाहुले असल्याचा आरोप भाजप परिवारातून केला जातो. तर युवकांच्या वेदना तो गाण्यातून मांडतो असे राज्यातील माकपच्या एका ज्येष्ठ मंत्र्याने स्पष्ट केले. युवावर्ग यातून पक्षाकडे आकर्षित होईल असे त्यांचे गणित आहे. आरोपांची ही राळ पाहता पुढील वर्षीच्या विधानसभा निवडणुकीत वेदन महत्त्वाची भूमिका बजावले असेच एकूण चित्र दिसते. केरळचे राजकारण माकप व काँग्रेस या दोन पक्षांच्या पुढाकाराने निर्माण झालेल्या आघाड्यांभोवतीच फिरत आहे. भाजप त्यात कोठेच नव्हता. किंबहुना चार ते पाच टक्के मतांच्या पुढे या पक्षाला मजल मारता आली नाही. मात्र एकूणच देशातील राजकारण, त्याला आंतरराष्ट्रीय स्थितीची जोड, यामुळे भाजप काही प्रमाणात राज्याच्या राजकारणातील तिसरा कोन म्हणून पुढे येऊ लागलाय.

राज्यात काँग्रेससाठी संधी?

लोकसभेला (२०२४) काँग्रेस आघाडीने राज्यातील २० पैकी १८ जागा जिंकल्याने काँग्रेसला सत्तेची संधी असल्याचे मानले जाते. लोकसभेला माकप व भाजपला प्रत्येकी १ जागा मिळाली. अर्थात लोकसभेच्या निकालावरून विधानसभेचे भाकीत करता येणार नाही. कारण २०१९ मध्येही असेच चित्र असताना माकपने पुन्हा बाजी मारली. यंदा हॅट्रिकचा विश्वास माकपला आहे. मुख्यमंत्री पिनराई विजयन यांच्या इतका लोकप्रिय नेता अन्य कोणाकडेही नाही. मात्र सलग दहा वर्षे सत्तेत राहिल्याने सत्ताविरोधी नाराजीची धास्ती या पक्षाला आहे. त्यात भाजप ख्रिश्चन समुदायातील किती मते घेणार यावर दोन्ही पक्षांचे भवितव्य ठरेल. राज्यात १८ टक्के ख्रिश्चन तर २६ टक्के मुस्लीम मते आहेत. हिंदूंमधील नायर तसेच इळवा समुदायातील मते लोकसभेला बऱ्यात प्रमाणात भाजपकडे वळाली. यामुळे जवळपास राज्यातून २० टक्के मते राष्ट्रीय लोकशाही आघाडीला मिळाल्याने माकपला धक्का बसला. भाजप कोणाची मते घेणार यावर डावी किंवा काँग्रेसच्या आघाडीचे भवितव्य ठरेल. राज्यात काँग्रेसचे संघटन उत्तम आहे. त्यांना मुस्लीम लीगची साथ आहे. अशा वेळी यंदा काँग्रेसला केरळमध्ये संधी खुणावत आहे. मात्र ८० वर्षीय मुख्यमंत्री पिनराई विजयन यांनाही चमत्काराची आशा आहे. यामुळे अनिश्चित राजकीय स्थितीत हा तिरंगी सामना होईल. त्यामुळेच डाव्या आघाडीने आपल्या कार्यक्रमात वेदनसारख्या युवा गायकला संधी देत पारंपरिक राजकारणाचा बाज बदलण्याचा प्रयत्न केला.