डॉ. सुजित मिणचेकर, गजानन जाधव यांचा शिवसेनेत प्रवेश, उद्धव- राज ठाकरेंना धक्का

कोल्हापूर जिल्ह्यात एकनाथ शिंदे शिवसेनेकडून ठाकरे शिवसेनेचे पदाधिकारी फोडण्याच्या हालचाली सुरू झाल्या आहेत. त्यातून आज डॉ. मिणचेकर व मनसेचे माजी जिल्हाप्रमुख, शिवसेनेचे माजी उपजिल्हा प्रमुख गजानन जाधव यांनी आज मुक्तागिरी निवासस्थानी एकनाथ शिंदे यांच्या उपस्थितीत शिवसेनेत प्रवेश केला.

डॉ. सुजित मिणचेकर आणि गजानन जाधव यांच्या पक्षप्रवेशामुळे कोल्हापूर जिल्ह्यात शिवसेनेला अधिक बळकटी मिळणार असून पक्ष अधिक भक्कम होणार असल्याचे मत शिंदे यांनी यावेळी बोलताना व्यक्त केले. लोकसभा निवडणुकीत या लोकसभेत खासदार धैर्यशील माने हे प्रचंड मतांनी विजयी झाले होते. तर विधानसभा निवडणुकीत येथे महायुतीचे १० पैकी १० आमदार विजयी झाले. त्यानंतर असाच विजय आगामी स्थानिक स्वराज्य संस्थांच्या निवडणुकीतही मिळावा यासाठी डॉ. मिणचेकर, गजानन जाधव आणि त्यांचे सर्व सहकारी नक्की प्रयत्न करतील असा विश्वास एकनाथ शिंदे यांनी यावेळी बोलताना व्यक्त केले. यामुळे शिंदे शिवसेनेचे जिल्ह्यातील राजकीय वजन वाढले आहे. या वेळी खासदार धैर्यशील माने, जिल्हाप्रमुख रवींद्र माने यांच्यासह प्रमुख पदाधिकारी उपस्थित होते.

दरम्यान मिणचेकर हे २०२४ मध्ये झा लेल्या विधानसभा निवडणुकीत स्वाभिमानी शेतकरी संघटनेत प्रवेश केला होता. स्वाभिमानी शेतकरी संघटनेत ऐनवेळी प्रवेश करून त्यांनी विधानसभेची निवडणूक लढवली होती. मात्र निवडणुकीचा पराभव झाला होता. २०१९ च्या निवडणुकीत ही त्यांना विजयाने हुलकावणी दिली होती. त्यावेळी त्यांनी शिवसेनेकडून निवडणूक लढवली होती. २००९ आणि २०१४ मध्ये ते आमदार होते. शिवसेनेत फूट पडल्यानंतर त्यांनी उद्धव ठाकरे यांना पाठिंबा दिला होता. मात्र २०२४ मधील विधानसभा निवडणुकीत त्यांना उमेदवारी मिळाली नाही त्यामुळे त्यांनी स्वाभिमानी शेतकरी संघटनेचा झेंडा हाती घेतला मात्र त्या ठिकाणी ते फार काळ टिकले नाहीत. गेल्या पाच महिन्यात त्यांनी दुसऱ्यांदा पक्ष बदलला. गेले काही दिवस ते, उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार अशी चर्चा होती. आणि आता त्यांनी प्रवेश केला आहे.