गतविजेत्या मुंबई इंडियन्सला पराभूत करुन आयपीएलच्या तेराव्या हंगामाची दणक्यात सुरुवात करणाऱ्या चेन्नई सुपरकिंग्जचं विमान दुसऱ्याच सामन्यात जमिनीवर आलं आहे. शारजा येथे झालेल्या सामन्यात राजस्थान रॉयल्सने चेन्नई सुपरकिंग्जवर १६ धावांनी मात केली. राजस्थानने विजयासाठी दिलेलं २१७ धावांचं आव्हान चेन्नईला पेलवलं नाही. २० षटकांत चेन्नईचा संघ २०० धावांपर्यंतच मजल मारु शकला.
वॉटसन आणि डु-प्लेसिस या जोडीने डावाची सुरुवात चांगली केली होती. परंतू वॉटसन माघारी परतल्यानंतर चेन्नईचा एकही फलंदाज मोठी भागीदारी करु शकला नाही. फाफ डु-प्लेसिसने एक बाजू लावून धरत फटकेबाजी करण्याचा प्रयत्न केला. परंतू दुसऱ्या बाजूने त्याला इतर फलंदाजांकडून योग्य साथ न मिळाल्यामुळे चेन्नईचे प्रयत्न तोकडेच पडले. डु-प्लेसिसने ७२ धावा केल्या. राजस्थानकडून राहुल तेवतियाने ३, आर्चर-गोपाळ आणि करन या जोडीने प्रत्येकी १-१ बळी घेतला.
त्याआधी, संजू सॅमसन आणि कर्णधार स्टिव्ह स्मिथ यांनी केलेल्या फटकेबाजीच्या जोरावर राजस्थान रॉयल्सने तेराव्या हंगामात आपला पहिला सामना खेळताना २१६ धावांचा डोंगर उभा केला. संजू सॅमसन आणि कर्णधार स्टिव्ह स्मिथ यांनी केलेल्या फटकेबाजीमुळे राजस्थानचा संघ वरचढ दिसत होता. परंतू सॅमसन माघारी परतल्यानंतर राजस्थानच्या मधल्या फळीतल्या फलंदाजांनी पुन्हा एकदा निराशा केली. परंतू अखेरच्या षटकांत तळातल्या फलंदाजांनी केलेल्या फटकेबाजीमुळे राजस्थानने २०० धावांचा टप्पा ओलांडला. सॅमसनने ३२ चेंडूत १ चौकार आणि ९ षटकारांसह ७४ धावा केल्या. स्मिथनेही ६९ धावा करत कर्णधारपदाची जबाबदारी निभावली.
नाणेफेक जिंकत चेन्नईचा कर्णधार धोनीने प्रथम गोलंदाजी करण्याचा निर्णय घेतला. पदार्पण करणाऱ्या मुंबईकर यशस्वी जैस्वालला स्वस्तात माघारी धाडत चेन्नईने चांगली सुरुवात केली. मात्र यानंतर मैदानावर आलेल्या संजू सॅमसनने स्टिव्ह स्मिथच्या साथीने चेन्नईच्या गोलंदाजीची धुलाई केली. दुसऱ्या विकेटसाठी शतकी भागीदारी करत दोन्ही फलंदाजांनी राजस्थानला सुस्थितीत आणलं. सॅमसनने १९ चेंडूत आपलं अर्धशतक झळकावलं. विशेषकरुन पियुष चावलावर दोन्ही फलंदाजांनी हल्लाबोल केला. एन्गिडीने सॅमसनला बाद करुन राजस्थानची जोडी फोडली आणि राजस्थानच्या डावाला गळती लागली.
मधल्या फळीत डेव्हिड मिलर, रॉबिन उथप्पा, राहुल तेवतिया, रियान पराग हे फलंदाज झटपट माघारी परतले. अखेरच्या षटकांत स्टिव्ह स्मिथही मोठा फटका खेळण्याच्या प्रयत्नात बाद झाला. त्याने ४७ चेंडूत ४ चौकार आणि ४ षटकारांच्या सहाय्याने ६९ धावा केल्या. चेन्नईकडून सॅम करनने ३, दीपक चहर-एन्गिडी आणि पियुष चावलाने प्रत्येकी १-१ बळी घेतला.
Highlights
परंतू वेळ हातातून निघून गेली, १६ धावांनी राजस्थान रॉयल्स विजयी
जोफ्रा आर्चरच्या गोलंदाजीवर सॅमसनकडे झेल देऊन परतला माघारी
७२ धावांची केली खेळी
राजस्थानच्या गोलंदाजांचा समाचार घेत झळकावलं अर्धशतक
बॅटची कड घेऊन उडालेला चेंडू यष्टीरक्षक सॅमसनने सुरेख झेल घेत टिपला
चेन्नईचा निम्मा संघ माघारी परतला
राहुल तेवतियाच्या गोलंदाजीवर पुढे येऊन फटका खेळताना ऋतुराज यष्टीचीत
चेन्नई सुपरकिंग्जचा संघ अडचणीत
राहुल तेवतियाच्या गोलंदाजीवर पुढे येऊन फटका खेळताना करन यष्टीचीत
२१ धावा काढून विजय माघारी, श्रेयस गोपाळने घेतला बळी
वॉटसनची २१ चेंडूत ३३ धावांची खेळी, १ चौकार आणि ४ षटकारांचा समावेश
पॉवरप्ले षटकांमध्ये फटकेबाजी, पहिल्या विकेटसाठी ५६ धावांची भागीदारी
चेन्नई सुपरकिंग्जला विजयासाठी २१७ धावांचं आव्हान
चेन्नईला विजयासाठी २१७ धावांचं आव्हान
एन्डिगीचा अखेरच्या षटकात स्वैर मारा, राजस्थानने ओलांडला २०० चा टप्पा
सॅम करनच्या गोलंदाजीवर षटकार खेळण्याच्या प्रयत्नात स्मिथ माघारी
केदार जाधवने घेतला झेल, ४७ चेंडूत ६९ धावांची खेळी
सॅम करनचे एकाच षटकांत दोन बळी
सॅम करनच्या गोलंदाजीवर तेवतिया माघारी
पियुष चावलाच्या गोलंदाजीवर रॉबिन उथप्पा माघारी, राजस्थानची धावगतीही मंदावली
सामन्यात अजुनही राजस्थान रॉयल्स वरचढ
एन्गिडीच्या गोलंदाजीवर चोरटी दुहेरी धाव काढताना मिलर धावबाद, राजस्थानचा तिसरा गडी माघारी
एन्गिडीच्या गोलंदाजीवर मोठा फटका खेळण्याच्या प्रयत्नात संजू सॅमसन माघारी
३२ चेंडूत सॅमसनच्या ७४ धावा, अर्धशतकी खेळीत एक चौकार आणि ९ षटकारांचा समावेश
चेन्नईच्या गोलंदाजांवर चौफर हल्लाबोल, १० व्या षटकाच्या आतच राजस्थानने ओलांडला १०० धावसंख्येचा टप्पा
चौफेर फटकेबाजी करुन १९ चेंडूत झळकावलं अर्धशतक
दुसऱ्या विकेटसाठी राजस्थानची महत्वपूर्ण भागीदारी, ओलांडला ५० धावसंख्येचा टप्पा
दीपक चहरच्या गोलंदाजीवर मोठा फटका खेळण्याच्या प्रयत्नात जैस्वाल माघारी, पहिल्याच सामन्यात केल्या केवळ ६ धावा
अंबाती रायुडूला संघात स्थान नाही...
मुंबईकर यशस्वी जैस्वालचं पदार्पण..
महाराष्ट्राच्या ऋतुराज गायकवाडला संघात स्थान
U-19 क्रिकेट आणि स्थानिक स्पर्धेत यशस्वीची उल्लेखनीय कामगिरी