Virat Kohli and Avesh Khan Funny Video Viral : आयपीाएल २०२४ मध्ये विराट कोहली जबरदस्त फॉर्ममध्ये आहे. त्याने आतापर्यंत खेळलेल्या चार सामन्यात दोन अर्धशतके झळकावली आहेत. आता तो राजस्थान रॉयल्सविरुद्धच्या हंगामातील १९व्या सामन्यात खेळताना दिसणार आहे. याआधी त्याचा एक व्हिडीओ समोर आला आहे, ज्यामध्ये तो राजस्थान रॉयल्सचा वेगवान गोलंदाज आवेश खानसोबत मस्ती करताना दिसत आहे. सामन्यांची नाणेफेक जिंकून आरआरने प्रथम गोलंदाजी करण्याचा निर्णय घेतला.
आरसीबी संघाने ६ एप्रिल रोजी राजस्थान रॉयल्सविरुद्धच्या सामन्यापूर्वी मैदानावर पोहोचून तयारी सुरू केली होती. सराव सत्रादरम्यान, कोहलीने आवेशशी विनोदी पद्धतीने भेट घेतली, ज्याचा व्हिडिओ राजस्थान रॉयल्स फ्रँचायझीने सोशल मीडियावर शेअर केला आहे. या व्हिडिओमध्ये कोहली आवेशला म्हणतो, ‘ये, ये उम्म्म्म… अशी संधी पुन्हा कुठे मिळणार आहे.’ यानंतर दोन्ही क्रिकेटपटूंनी मिठी मारली. विराट कोहलीने अशा हटक्या शैलीत आवेश खानची भेट घेतल्याने चाहत्यांना मागील हंगामातील एका सामन्याची आठवण झाली. जेव्हा आवेशने लखनऊकडून खेळताना आरसीबीविरुद्ध विजय मिळवल्यानंतर हेल्मेट जमिनीवर आपटले होते.
विजयानंतर जमिनीवर आपटले होते हेल्मेट –
वास्तविक, आवेश आणि कोहली दोघेही आयपीएल २०२३ मध्ये आरसीबी आणि लखनऊ सुपर जायंट्सच्या दोन सामन्यांदरम्यान प्रकाशझोतात आले होते. आरसीबी आणि एलएसजी यांच्यातील पहिला सामना रोमांचक होता, ज्यामध्ये केएल राहुलच्या संघाने बाजी मारली. या सामन्यात आरसीबीविरुद्ध धावांचे आव्हान पूर्ण करताना क्रीजवर असलेला लखनऊचा खेळाडू आवेश खान याने विजयाचा आनंद साजरा करण्यासाठी आपले हेल्मेट जमिनीवर फेकले होते. यानंतर आवेशला त्याच्या या कृतीसाठी मोठा दंड भरावा लागला.
राजस्थान विजयाच्या रथावर स्वार –
आयपीएल २०२४ बद्दल बोलायचे झाले, तर संजू सॅमसनची राजस्थान रॉयल्स विजयाच्या रथावर स्वार आहे. संघाने आतापर्यंत ३ सामने खेळले असून तिन्ही सामने जिंकले आहेत. राजस्थानचा संघ पॉइंट टेबलमध्ये दुसऱ्या स्थानावर आहे. अशा स्थितीत राजस्थानवर मात करणे रॉयल चॅलेंजर्स बंगळुरूसाठी सोपे जाणार नाही. आरसीबीबद्दल बोलायचे झाले तर, संघाने आतापर्यंत चार सामने खेळले आहेत, ज्यात फक्त एक जिंकला आहे. या सामन्यात विराट कोहलीकडून चाहत्यांना आणि व्यवस्थापनालाही चांगल्या कामगिरीची अपेक्षा असेल.
दोन्ही संघांची प्लेइंग इलेव्हन –
राजस्थान रॉयल्स : यशस्वी जैस्वाल, जोस बटलर, संजू सॅमसन (कर्णधार आणि यष्टिरक्षक), रियान पराग, ध्रुव जुरे, शिमरन हेटमायर, रविचंद्रन अश्विन, ट्रेंट बोल्ट, आवेश खान, नांद्रे बर्गर, युजवेंद्र चहल.
हेही वाचा – IPL 2024 : ‘त्याची चूक काय…’, हार्दिकवर होणाऱ्या टीकेवर दिग्गज समालोचक संतापला, टीकाकारांना दाखवला आरसा
रॉयल चॅलेंजर्स बंगलोर: विराट कोहली. फाफ डू प्लेसिस (कर्णधार), रजत पाटीदार, ग्लेन मॅक्सवेल, कॅमेरॉन ग्रीन, दिनेश कार्तिक (यष्टीरक्षक), सौरव चौहान, रिन टोपली, मयंक डागर, मोहम्मद सिराज, यश दयाल.