Brian Lara on Mohammad Hafeez: नुकत्याच झालेल्या एकदिवसीय विश्वचषकात विराट कोहलीने सचिन तेंडुलकरचा ४९ शतकांचा विक्रम मोडला. आंतरराष्ट्रीय क्रिकेटमध्ये त्याच्या एकूण शतकांची संख्या ८० वर पोहोचली आहे. विराट सचिनचा आंतरराष्ट्रीय क्रिकेटमधील १०० शतकांचा विक्रम मोडेल, असा विश्वास चाहत्यांना आहे. मात्र, वेस्ट इंडिजचा माजी फलंदाज आणि महान क्रिकेटपटू ब्रायन लाराची विचारसरणी वेगळी आहे. या गोष्टी तर्कहीन असल्याचे त्यांनी सांगितले. तसेच, त्याने विराट कोहलीबाबत अपशब्द बोलणाऱ्या पाकिस्तानच्या मोहम्मद हाफिजला वेस्ट इंडिजच्या माजी खेळाडू ब्रायन लाराने सडेतोड उत्तर दिले आहे.
भारताला पुढील वर्षी फक्त पाच एकदिवसीय सामने खेळायचे आहेत आणि त्यांच्या टी-२० आंतरराष्ट्रीय भविष्याबद्दल अद्याप कोणतीही स्पष्टता नाही. कोहलीला जर तेंडुलकरशी बरोबरी साधायची असेल किंवा त्याला मागे टाकायचे असेल तर त्याला कसोटी क्रिकेटवर बरेच अवलंबून राहावे लागेल. पुढील चार वर्षे पूर्ण तंदुरुस्तीने खेळत राहिल्यास तेंडुलकरशी बरोबरी साधण्यासाठी त्याला दरवर्षी पाच शतके झळकावी लागतील, जे सोपे नाही.
‘स्वार्थी‘ कोहली या हाफिजने केलेल्या वक्तव्याचा लाराने घेतला समाचार
कोहलीने नुकत्याच संपलेल्या एकदिवसीय विश्वचषकात ११ सामन्यात ९५.६२च्या सरासरीने ७६५ धावा केल्या. विश्वचषकाच्या एकाच आवृत्तीत ७०० हून अधिक धावा करणारा तो पहिला क्रिकेटर ठरला आहे. त्याने तीन शतकेही झळकावली, परंतु अनेक शतके झळकावण्यासाठी त्याने आपला डाव संथ केला, त्यामुळे त्याच्यावर तो स्वार्थी खेळ करत असल्याची टीका झाली. त्यात पाकिस्तानचा माजी खेळाडू मोहम्मद हाफिज हा आघाडीवर होता. विराट खरंच हे करत होता का? याबाबत लाराला विचारले असता, त्याने हाफिजच्या वक्तव्याला मूर्खपणा म्हटले आहे.
लारा म्हणाला, “जे हे बोलत आहेत ते विराटचा हेवा करत आहेत. त्याने इतक्या धावा केल्या आहेत त्यामुळे त्याचा हेवा सर्वांना वाटतो. मी माझ्या कारकिर्दीतही या अशा टीकांचा सामना केला आहे. स्वार्थी म्हणणाऱ्यांना त्याचा खूप हेवा वाटतो.” पाकिस्तानच्या मोहम्मद हाफीजने विराटवर संथ खेळण्याचा आरोप केला होता. हाफिजने विराटवर एका शोदरम्यान शतक झळकावताना स्वार्थी असल्याचा आरोप केला होता. आता ब्रायन लाराने त्याचे नाव न घेता त्याला प्रत्युत्तर दिले आहे.
कोहलीच्या फलंदाजीचा चाहता असूनही अनुभवी ब्रायन लाराने मोठे विधान केले. तो एका मुलाखतीत म्हणाला, “कोहलीचे आता वय काय आहे? ३५ बरोबर? त्याच्या खात्यात ८० शतके आहेत, मात्र त्याला अजून २० शतकांची गरज आहे. जर त्याने दरवर्षी पाच शतके झळकावली तर त्याला तेंडुलकरशी बरोबरी साधण्यासाठी आणखी चार वर्षे लागतील. त्यावेळी कोहली ३९ वर्षांचा असेल. हे खूप अवघड काम आहे.”
