Ranji Trophy: विराट कोहलीला क्लीन बोल्ड करणारा हिमांशू सांगवान आहे तरी कोण? सेहवागचा आहे शेजारी

या सामन्यात दिल्लीने नाणेफेक जिंकून प्रथम गोलंदाजी करण्याचा निर्णय घेतला आणि रेल्वेने पहिल्या डावात २४१ धावा केल्या. याला प्रत्युत्तर म्हणून दिल्लीची सुरुवातही फारशी चांगली झाली नाही आणि फलंदाज कोहलीने पहिल्या डावात सर्वांना निराशा केलं. पहिल्या डावात त्याने १५ चेंडूत एका चौकाराच्या मदतीने ६ धावा केल्या आणि हिमांशू सांगवानच्या गोलंदाजीवर क्लीन बोल्ड झाला.

कोण आहे हिमांशू सांगवान? (Who is Himanshu Sangwan?)

२९ वर्षीय हिमांशू सांगवानचा जन्म नजबगड (दिल्ली) येथे झाला आणि तो वीरेंद्र सेहवागचा माजी टीम इंडियाच्या खेळाडूचा शेजारी आहे. सेहवागही नजबगडचा आहे. सांगवान यापूर्वी दिल्लीकडून खेळला होता आणि तो दिल्लीच्या अंडर-१९ संघाचा भाग होता आणि नंतर त्याने रेल्वेकडून खेळण्यास सुरूवात केली.

हिमांशूने देशांतर्गत क्रिकेटमध्ये चमकदार कामगिरी केली आहे. त्याने २०१९-२० मध्ये रेल्वेसाठी रणजीत पदार्पण केले. त्याच मोसमात विजय हजारे ट्रॉफीमध्ये लिस्ट ए मध्ये त्याचे पदार्पण झाले. विराट कोहलीची विकेट घेणारा हिमांशू देशांतर्गत क्रिकेटमध्ये पदार्पण करण्यापूर्वी दिल्ली रेल्वे स्टेशनवर तिकीट कलेक्टर म्हणून काम करत होता. हिमांशूने मुंबईविरुद्ध खेळल्या गेलेल्या सामन्यात आपली छाप पाडली. मुंबई विरुद्धच्या रणजी सामन्यात त्याने ६० धावा देत ६ विकेट घेत चांगलीच खळबळ उडवून दिली होती.

हिमांशूने आतापर्यंत २३ प्रथम श्रेणी सामने खेळले असून ४० डावात ७७ विकेट घेतले आहेत. हिमांशूची फर्स्ट क्लास इनिंगमध्ये ३३ धावांत ६ विकेट्स ही सर्वोत्तम कामगिरी आहे तर एका सामन्यातील त्याची सर्वोत्तम कामगिरी ८१ धावांत ७ विकेट अशी आहे. हिमांशू उजव्या हाताने फलंदाजी करतो आणि उजव्या हाताचा वेगवान गोलंदाज आहे.