Is Angry Healthy: तो किती रागीट आहे.. यार इतकं चिडचिड करणं बरं नाही, तुमचा स्वभाव तापट आहे का? मनाविरुद्ध गोष्टी झाल्यावर तुम्ही चटकन रागावता का? मग आजवर तुम्हाला नक्कीच अनेकांनी कसं जरा ‘थंड’ घ्यायला हवं याविषयी न मागता सल्ला दला असेल. राग व्यक्त करणं या विषयाला नेहमीच नकारात्मक भावनेशी जोडून मांडले जाते पण आज आपण या सर्व समजुतींना छेद देणारी माहिती पाहणार आहोत. तुम्हाला ठाऊक आहे का तुमचा राग तुम्ही जर दाबून ठेवला तर कदाचित इतरांचा एक दिवस चांगला जाईल पण त्यामुळे आपले दीर्घकालीन नुकसान होऊ शकते.
शैक्षणिक तज्ज्ञ सारा ऐर्ड यांनी अलीकडेच आपल्या इन्स्टाग्राम पोस्टमध्ये आरोग्यासाठी गुणकारी रागविषयी माहिती दिली आहे. शिवाय भावनांवर कसं वर्चस्व मिळवता येईल यावरही मार्गदर्शन केले आहे. चला तर जाणून घेऊयात रागामुळे तुमचा कसा फायदा होऊ शकतो.
भावनांवर नियंत्रण म्हणजे सदैव आनंद?
खरंतर अनेकदा मानसशास्त्र तज्ज्ञ नेहमी आनंदी राहा असा सल्ला देतात पण मानसिक आरोग्य सदृढ असणे म्हणजे तुम्ही केवळ हसत राहणे नाही तर तुम्हाला तुमचा राग, दुःख, वेदना सुद्धा तितक्याच सहज हाताळता येणं गरजेचं आहे. त्यासाठी या भावनांचा स्वीकार करता यायला हवा.
तुमचा राग लपवल्यास काय होते?
अनेकदा ऑफिसमध्ये समजुतीने वागताना राग लपवावा लागतो पण तो राग विसरता येत नाही याचा परिणाम इतर दिवशी दिसून येतो. हे टाळायचे असल्यास आपण राग व्यक्त करणे आवश्यक आहे. तुम्हाला जर त्या व्यक्तीशी बोलून राग व्यक्त करायचा नसेल तर तुम्ही लिहून, किंवा तुमच्या कल्पनाशक्तीच्या जोरावर त्या व्यक्तीच्या प्रतिकात्मक आकृतसमोर राग बोलून दाखवावा. इतरांवर राग काढण्यापेक्षा हा सर्वात सोपा मार्ग आहे.
बहुतांश आजारांच्या मागेही लपवलेला राग कारण ठरू शकतो. जगप्रसिद्ध लेखिका लुईस हे यांनी आपल्या यु कॅन हिल युअर लाईफ या पुस्तकात याचे दाखले दिले आहेत. लहानपणीच्या संतापातून कॅन्सर सारख्या आजाराला बळी पडल्याचे त्यांनी आपल्या पुस्तकात म्हंटले होते यावर उपाय शोधताना राग मान्य करून, व्यक्त करून, सोडून देण्याची साधी प्रक्रिया त्यांनी स्विकारली होती. जेव्हा राग इतरांना त्रास न देता व्यक्त केला जातो तेव्हा तुमच्या खऱ्या समस्यांवर उत्तरही मिळू शकते.