Ajit Pawar on Sangram Jagtap Remark : दिवाळीच्या तोंडावर राष्ट्रवादी काँग्रेसचे (अजित पवार गट) आमदार संग्राम जगताप यांनी केलेल्या एका विधान सध्या चांगलेच चर्चेत आहे. सोलापूर येथे झालेल्या हिंदू आक्रोश मोर्चामध्ये बोलताना संग्राम जगताप यांनी केलेले विधानामुळे वाद पेटला आहे. यंदाच्या दिवाळीत खरेदी करताना ती फक्त हिंदूंकडूनच करा असे विधान त्यांनी केले आहे. यानंतर राज्याचे उपमुख्यमंत्री अजित पवार यांनी प्रतिक्रिया दिली आहे.

अजित पवार काय म्हणाले?

दरम्यान उपमुख्यमंत्री अजित पवार यांनी माध्यमांशी बोलताना संग्राम जगताप यांचे विधान चुकीचे असून पक्षाला ते मान्य नसल्याचे म्हटले आहे. अजित पवार म्हणाले की, “त्यांनी अतिशय चुकीचे विधान केले आहे. आम्ही त्यांना कारणे दाखवा नोटीस पाठवणार आहोत. एकदा पक्षाची ध्येय-धोरणे ठरल्यानंतर पक्षाच्या विचारधारेपासून कुठलाही खासदार-आमदार किंवा संबंधित जबाबदार व्यक्ती अशा प्रकारची वक्तव्य करत असतील, तर ती वक्तव्य राष्ट्रवादी काँग्रेस पक्षाला मान्य नाहीत”

“खरंतर अरुणकाका जगताप जोपर्यंत हयात होते, तोपर्यंत तिथं सगळं सुरळीत होतं. पण आता काही लोकांनी, आपल्यावर जबाबदारी वाढलेली आहे. आपल्या वडिलांचं छत्र आपल्यावर राहिलं नाहीये, त्यामुळे आपण जबाबदारीने वागलं पाहिजे, बोललं पाहिजे. हा शिव-शाहू-फुले-आंबेडकरांचा महाराष्ट्र सर्वांना पुढे घेऊन जाणारा आहे,” असेही अजित पवार म्हणाले.

पुढे बोलताना अजित पवार म्हणाले की, “मी एका कार्यक्रमाला गेलो होतो, तेव्हाही त्यांना (संग्राम जगताप) सांगितलं होतं. ते म्हणाले होते की मी यामध्ये सुधारणा करेन, पण सुधारणा करताना दिसत नाही. त्यामुळे त्यांची जी भूमिका आणि विचार आहेत ते पक्षाला मान्य नाहीत”.

हेही वाचा

संग्राम जगताप काय म्हणाले होते?

सोलापूर येथे हिंदू आक्रोश मोर्च्यावेळी बोलताना राष्ट्रवादी काँग्रेस (अजित पवार गट) संग्राम जगताप म्हणाले होते की, मी सर्वांना विनंती करेन दिपावलीच्या निमित्ताने खरेदी करताना आपला पैसा, आपली खरेदी आणि आपल्यातला जो नफा मिळेल तो फक्त आणि फक्त हिंदू माणसालाच झाला पाहिजे, अशा प्रकारची दिपावली सर्वांनी साजरी करावी, असे संग्राम जगताप म्हणाले होते.

बाबासाहेब पाटील यांनी शेतकरी आणि कर्जमाफीबद्दल केलेल्या विधानाबद्दल बोलताना अजित पवार म्हणाले की, मी त्यांना विचारेन. बळीराजाबाबत असं वक्तव्य करण्याचं काहीच कारण नाही. मंत्री महोदयांनी तसं वक्तव्य केलं असेल तर मी त्यांच्याशी बोलेन आणि त्यांना दोन गोष्टी सांगेन, असे अजित पवार म्हणाले.