सातारा: शेंद्रे (ता. सातारा) येथील अजिंक्यतारा सहकारी साखर कारखान्याचा व किसन वीर साखर कारखान्याचा बॉयलर अग्निप्रदीपन समारंभ दसऱ्याच्या दिवशी म्हणजेच गुरुवार (दि. २) रोजी सकाळी ११ वाजता होणार आहे. या समारंभास कारखान्याचे मार्गदर्शक संचालक तथा राज्याचे सार्वजनिक बांधकाम मंत्री शिवेंद्रसिंहराजे भोसले यांची प्रमुख उपस्थिती राहणार आहे. किसन वीर कारखान्याचा बॉयलर अग्निप्रदीपन समारंभ मदत व पुनर्वसन मंत्री कारखान्याचे अध्यक्ष मकरंद पाटील व त्यांच्या सुविद्य पत्नी अर्चना पाटील यांच्या हस्ते सकाळी साडेअकरा वाजता होणार आहे.
दरम्यान, सोनगाव- करंदोशी (ता. जावली) येथील अजिंक्यतारा- प्रतापगड उद्योगाच्या प्रतापगड सहकारी साखर कारखान्याचा बॉयलर अग्निप्रदीपन समारंभ आज दसऱ्याच्या मुहूर्तावर गुरुवारी (दि. २) रोजी दुपारी १ वाजता होणार आहे. या सोहळ्याला शिवेंद्रसिंहराजे भोसले आणि कारखान्याचे अध्यक्ष सौरभ शिंदे यांची प्रमुख उपस्थिती राहणार आहे. या दोन्ही समारंभास दोन्ही कारखान्याचे आजी, माजी पदाधिकारी व संचालक, विविध संस्थांचे आजी, माजी पदाधिकारी, कार्यकर्ते, सर्व सभासद, शेतकरी यांनी उपस्थित राहावे, असे आवाहन कार्यकारी संचालक जिवाजी मोहिते यांनी केले आहे.