गानसम्राज्ञी लता मंगेशकर यांनी करोना विषाणूविरोधात जीवाचा धोका पत्करुन लढणाऱ्या सर्व कर्मचाऱ्यांचे आभार मानले आहेत. पंतप्रधान नरेंद्र मोदी यांनी आज (रविवारी) टाळ्या आणि थाळ्या वाजवून या करोना योद्ध्यांचे आभार मानण्याचे आवाहन जनतेला केलं होतं. या आवाहनला जनतेनं चांगला प्रतिसाद दिला आहे. संध्याकाळी बरोबर ५ वाजता लोकांनी आपापल्या सोसायट्यांच्या परिसरात, गॅलरीमध्ये येऊन टाळ्या वाजवल्या तसेच बच्चे कंपनीनं थाळ्या वाजवून प्रतिसाद दिला. या पार्श्वभूमावर लता मंगेशकर यांनी जनतेला सुरक्षित ठेवण्यासाठी दिवसरात्र झटणाऱ्या सर्व करोना योद्ध्यांचे आभार मानले आहेत.
काय म्हणाल्या लता मंगेशकर?
“नमस्कार, करोना विषाणूविरोधात जीवाचा धोका पत्करुन लढणारे डॉक्टर, नर्सेस, वैद्यकीय स्टाफ, पोलीस, महानगरपालिका आणि इतर कर्मचाऱ्यांचे मी मनःपूर्वक आभार आभार मानते.” असं ट्विट लतादीदींनी केले आहे. लता मंगेशकर यांचे हे ट्विट सध्या सोशल मीडियावर जोरदार व्हायरल होत आहे. काही तासांत शेकडो नेटकऱ्यांनी यावर आपल्या प्रतिक्रिया दिल्या आहेत.
राज्यातील जनतेनेही पंतप्रधानांच्या आवाहनाला मोठा प्रतिसाद दिला आहे. मुंबई, पुणे, नाशिक इथून नागरिकांनी आपापल्या सोसायट्यांमध्ये टाळ्या वाजवून, थाळ्या वाजवून तसेच पुण्यात काही ठिकाणी लोकांनी फटाके फोडून करोना योद्ध्यांचे आभार मानले आहेत. मुंबईत महानायक अमिताभ बच्चन यांनी देखील आपल्या कुटुंबियांसोबत बंगल्याच्या गच्चीवर जाऊन टाळ्या वाजवून आणि घंट्या वाजवून पंतप्रधानांच्या आवाहनाला प्रतिसाद दिला. तसेच राष्ट्रवादी काँग्रेसचे प्रमुख शरद पवार आणि संरक्षणमंत्री राजनाथ सिंह यांनी देखील मोदींच्या आवाहनाला प्रतिसाद दिला आहे.