पंढरपूर : कार्तिकी यात्रा निमित्त पंढरीत येणाऱ्या भाविकांना दर्शन देण्यासाठी सावळ्या विठुराया आता २४ तास उभा राहणार आहे. २६ ऑक्टोबर ते ९ नोव्हेंबर या कालावधीत देवाचे दर्शन २४ तास राहणार आहे. देवाचा विश्रांतीचा चांदीचा पलंग विधिवत पूजा करून काढण्यात आला.
त्यानंतर विठ्ठलाच्या मागे आणि रुक्मिणी मातेच्या पाठीला मऊ कापसाचा लोड लावण्यात आल्याची माहिती श्री विठ्ठल रुक्मिणी मंदिर समितीचे सह अध्यक्ष ह.भ.प. गहिनीनाथ महाराज औसेकर यांनी दिली. दरम्यान, कार्तिकी एकादशी २ नोव्हेंबर रोजी आहे.
वारकरी संप्रदायाला शेकडो वर्षांची परंपरा आहे. या परंपरेनुसार आषाढी आणि कार्तिकी वारीच्या दरम्यान भाविकांना दर्शन सुलभ व्हावे म्हणून देव २४ तास उभा असतो. या कालावधीत देवाच्या शेजघरातील विश्रांतीचा पलंग काढला जातो. हा पलंग काढण्याआधी विधिवत पूजा करून देवाच्या शेजघरातील पलंग बाहेर काढण्यात आला.
यावेळी या चांदीच्या पलंगावरील देवाच्या गाद्या गिरद्या देखील बाहेर काढून ठेवण्यात आल्या. आजपासून देवाचे सर्व राजोपचार बंद करून देव फक्त भाविकांच्या दर्शनासाठी सज्ज झाला आहे, अशी माहिती औसेकर महाराज यांनी दिली. देवाचे दर्शन २४ तास खुले केल्याने आता रोज पायावर ५० हजार तर मुखदर्शनातून ५० ते ६० हजार भाविकांना दर्शन मिळू शकणार आहे.
परंपरेनुसार श्रींचा पलंग काढल्याने दररोज २४ तास मुखदर्शन व २२.१५ तास पदस्पर्श उपलब्ध होणार आहे. याशिवाय, मंदिर समितीच्या संकेतस्थळावरून व जागोजागी एलईडी टीव्हीद्वारे देवाचे ‘लाईव्ह दर्शन’ उपलब्ध करून देण्यात आले आहे. संपूर्ण यात्रा कालावधीत भाविकांच्या हस्ते होणाऱ्या पूजा व व्हीआयपी दर्शन बंद ठेवण्यात आलेले आहे.
तसेच दर्शन रांगेत घुसखोरी करणाऱ्यांवर कारवाई केली जाणार असल्याचे मंदिर समितीचे कार्यकारी अधिकारी राजेंद्र शेळके यांनी सांगितले. यात्रा झाल्यावर म्हणजे ९ नोव्हेंबर रोजी प्रक्षाळ पूजा करण्यात येणार आहे. त्या नंतर देवाचे नित्योपचार पुन्हा सुरू राहणार असल्याचे शेळके यांनी सांगितले.
विठुरायाचे नित्यक्रम
पहाटे साडेचार वाजता देवाचे स्नान आणि नित्यपूजा करण्यात येईल. या काळात फक्त एक तास दर्शन बंद असेल. यानंतर दुपारी महानैवेद्याला १५ मिनिटे आणि रात्री नऊ वाजता लिंबू पाणी देण्यासाठी १५ मिनिटे दर्शन थांबविण्यात येणार असल्याची माहिती मंदिर समितीचे कार्यकारी अधिकारी राजेंद्र शेळके यांनी दिली आहे. याशिवाय संपूर्ण दिवस रात्र विठुराया आपल्या लाडक्या भक्तांना दर्शन देत उभा असणार आहे.