Maharashtra Heavy Rain Alert : राज्यात पावसामुळे पाच दिवसांत २१ जणांचा मृत्यू; कोल्हापुरात सततच्या पावसामुळे पूरसदृश्य परिस्थिती

मुंबईत पुढील दोन दिवस पावसाचा जोर कायम राहणार आहे. त्यानंतर शुक्रवारपासून पावसाचा जोर ओसरेल, अशी माहिती हवामान विभागाने दिली. मुंबईसह ठाणे, पालघर जिल्ह्यांत मंगळवारीही अतिमुसळधार पावसाचा इशारा देण्यात आला आहे. त्यामुळे गरज असेल तरच घराबाहेर पडा, असे आवाहन हवामान विभागाने केले आहे.

मलबार हिल येथील नेपियन सी रोड परिसरातील शिमला हाऊस येथे संरक्षक भिंत अंगावर पडल्यामुळे एकाचा मृत्यू झाला आहे. सतीश तिर्के असे यात मृत्युमुखी पडलेल्या व्यक्तीचे नाव आहे. तर, वांद्रे येथील कनकिया पॅलेस इमारतीजवळील बीकेसी पुलावरून मिठी नदीत उतरलेला युवक बेपत्ता आहे. वरदान जंजोतार (२४) असे त्याचे नाव आहे.

मुंबई शहर, उपनगरे तसेच ठाणे जिल्ह्यात गेल्या तीन दिवसांपासून चांगला पाऊस होत आहे. सोमवारी पावसाने आणखी जोर पकडला. सकाळी ११ नंतर मुलुंड, भांडुप, घाटकोपर, कुर्ला, शीव, जोगेश्वरी, बोरिवली, मालाड, अंधेरी, सांताक्रुझ, कुलाबा या भागांत मुसळधार पाऊस सुरू झाला.