सांगली : नात्यातील मुलीवर लैगिंक अत्याचार केल्याप्रकरणी कुंडल येथील नागेश हंबीरराव होवाळ (वय ३६) या आरोपीला जिल्हा सत्र न्यायालयाने १० वर्षे सश्रम कारावास आणि दहा हजार रुपये दंडाची शिक्षा गुरुवारी ठोठावली.
आरोपी हा पीडितेच्या नातेसंबंधातील असून त्यांने अल्पवयीन पीडितेवर लैंगिक अत्याचार केले होते. ही बाब मुलगी आजारी पडल्याने रुग्णालयात तपासणीसाठी गेली असताना फेब्रुवारी २०१६ मध्ये समोर आली. यावेळी पीडिता सहा महिन्याची गरोदर होती. आरोपींने लैंगिक अत्याचार करीत असताना जीवे मारण्याची धमकी देऊन हा प्रकार केल्याचे पीडितेने सांगितले. खुनाची धमकी दिल्याने हा प्रकार तिने कोणालाही सांगितला नव्हता.
या प्रकरणी कुंडल पोलीस ठाण्यात गुन्हा दाखल करण्यात आला होता.
हेही वाचा – आमदारांच्या अपात्रतेचा निर्णय सर्वोच्च न्यायालय घेणार का? उज्ज्वल निकम म्हणाले…
पोलिसांनी तपास करून आरोपीविरुद्ध आरोपपत्र जिल्हा सत्र न्यायालयात सादर केले होते. न्या.डी. एस. हातरोटे यांच्यासमोर हा खटला चालविला गेला. न्यायालयात दहा साक्षीदार तपासण्यात आले. तसेच, न्यायवैज्ञानिक प्रयोगशाळेचा अहवाल सादर करण्यात आला. न्यायालयाने साक्ष व पुरावे ग्राह्य मानून आरोपी होवाळ याला दोषी ठरवून दहा वर्षे सश्रम कारावास आणि दहा हजार रुपये दंडाची शिक्षा सुनावली. या प्रकरणी सरकार पक्षाच्यावतीने आरती देशपांडे-साटविलकर यांनी काम पाहिले.