प्रसिद्ध अभिनेता आणि भाजपा खासदार सनी देओलच्या जुहू येथील बंगल्याचा लिलाव प्रस्तावित होता. परंतु, लिलावाची जाहिरात प्रसिद्ध होताच अवघ्या २४ तासांत ही जाहिरात बँक ऑफ बडोदाला मागे घ्यावी लागली. ५६ कोटी रुपयांची थकबाकी राहिल्याने हा बंगला लिलावासाठी काढण्यात येणार होता. या सर्व पार्श्वभूमीवर संजय राऊतांनी राज्य आणि केंद्र सरकारवर टीका केली आहे.
“सनी देओल यांनी ६०-७० कोटी रुपये बँकेचे थकवले. त्यामुळे बँकेने त्यांच्या बंगल्याचा लिलाव काढला. पण २४ तासांत दिल्लीतून सूत्र हलली आणि त्यांच्या बंगल्याचा लिलाव रद्द करण्यात आला. त्यांना वाचवलं, त्यांचा बंगला वाचवला. मग हाच न्याय नितीन देसाईंना का नाही मिळाला? असा सवाल संजय राऊतांनी आज विचारला.
हेही वाचा >> “…म्हणजे स्वत:वर अंत्यसंस्कार करण्यासारखं”, अजित पवारांच्या सभेवर संजय राऊतांचं टीकास्र
“आत्महत्येआधी दोन दिवसांपूर्वी प्रसिद्ध कलादिग्दर्शक नितीन देसाई दिल्लीत गेले होते. स्टुडिओ वाचवण्याकरता किंवा कर्ज फेडण्यासाठी मुदत वाढवून देण्याकरता त्यांनी दिल्लीतील भाजपा नेत्यांची भेट घेतली होती. त्यांनी डोळ्यांतून पाणी काढल्याचंही म्हटलं जातंय. माझं स्वप्न वाचवा, असं ते म्हणाले होते. पण त्यांना वाचवलं नाही. दिल्लीतून येऊन त्यांनी आत्महत्या केली. त्यांना आत्महत्येस प्रवृत्त केलं, असंही राऊत म्हणाले.
“सनी देओल भाजपाचे खासदार आहेत, भाजपाचे स्टार प्रचारक आहे. आमच्या महाराष्ट्रातील नितीन देसाईंना वेगळा न्याय, नितीन देसाईंना मरू दिलं, त्यांच्या स्टुडिओचा लिलाव होऊ दिलात”, असा आरोपही त्यांनी यावेळी केला.