सावंतवाडी : महाराष्ट्र पक्ष मित्र संघटनेच्या आवाहनानुसार, वाईल्ड कोकण सावंतवाडी या संस्थेच्या वतीने ५ नोव्हेंबर ते १२ नोव्हेंबर या कालावधीत ‘पक्षी सप्ताह’ उत्साहात साजरा करण्यात आला. या निमित्ताने सावंतवाडी येथील प्रसिद्ध नरेंद्र डोंगरावर पक्षीनिरीक्षणाचे आयोजन करण्यात आले होते. या दोन तासांच्या पक्षीनिरीक्षणामध्ये तब्बल ४६ विविध पक्षांची नोंद करण्यात आली, ज्यामुळे नरेंद्र डोंगर परिसरातील समृद्ध पक्षीविविधतेचे दर्शन घडले.
ज्येष्ठ पक्षी निरीक्षक मारुती चितमपल्ली यांचा जन्मदिवस (५ नोव्हेंबर) आणि सुप्रसिद्ध पक्षीतज्ज्ञ पद्मश्री डॉ. सलीम अली यांचा जन्मदिवस (१२ नोव्हेंबर) या दोन महान व्यक्तिमत्त्वांच्या जन्मदिवसाचे औचित्य साधून हा आठवडा पक्षी सप्ताह म्हणून साजरा केला जातो.
नोंद झालेल्या प्रमुख पक्ष्यांच्या प्रजाती
सकाळी सात ते नऊ या वेळेत झालेल्या या निरीक्षणात फ्लेम थ्रोटेड बुलबुल, फॉर्क टेल ड्रोन्गो, चेस्नट हेडेड बीइटर, हार्ट स्पॉटेड उडपीकर, लेसर व्हाईट थ्रोट, व्हाईट चिक्ड बार्बेट, ब्राऊन हेडेड बारबेट, ब्लू राॅक थ्रश, व्हर्डीटर फ्लाय कॅचर, गोल्डन फ्रंटेड लीफबर्ड, स्वर्गीय नर्तक , वेलवेट फ्रंटेड नट्याच, शिकरा, व्हाईट रम्प्ड शामा, ग्रीनीश बॅबलर, वेस्टर्न क्राउन्ड वारब्लर आदींसह अनेक दुर्मिळ व प्रदेशानिष्ठ प्रजातींच्या पक्षांची नोंद करण्यात आली.
या महत्त्वपूर्ण पक्षीनिरीक्षणामध्ये वाईल्ड कोकण संस्थेचे अध्यक्ष प्रा. धीरेंद्र होळीकर, उपाध्यक्ष प्रा. सुभाष गोवेकर, सचिव प्रा. डॉ. गणेश मर्गज, मार्गदर्शक व सेवानिवृत्त सहाय्यक वनसंरक्षक श्री. सुभाष पुराणिक, तसेच बांदा येथील पक्षीनिरीक्षक श्री. प्रवीण सातोसकर यांनी सक्रिय सहभाग घेतला.
याशिवाय, सौ. व श्री. जगदीश सावंत, श्री. संजय सावंत (कुणकेरी), कु. ज्ञानेश नाईक, रुहान शेख, रुपेश तेंडोलकर, चैताली पाटकर, आर्या गायकवाड, ऐश्वर्या गायकवाड, विना सावंत, कृपा परब, मनाली पार्सेकर आणि ओमकार परब या निसर्गप्रेमींनीही या कार्यक्रमात उत्साहाने सहभाग नोंदवला.
कार्यक्रमाचे प्रास्ताविक संस्थेचे सचिव डॉ. गणेश मर्गज यांनी केले, तर उपस्थितांचे आभार उपाध्यक्ष प्रा. सुभाष गोवेकर यांनी मानले.