Ahmedabad Plane Crash : १२ जून रोजी अहमदाबादमध्ये एअर इंडियाचे विमान AI171 उड्डाणानंतर काही सेकंदातच कोसळले. अहमदाबाद विमान अपघातात २५० हून अधिक जणांचा मृत्यू झाला आहे. या दुःखद अपघातानंतर अनेक बॉलीवूड सेलिब्रिटींनी पीडितांप्रती शोक व्यक्त केला. आता आणखी एका अभिनेत्रीने विमान अपघाताबाबत तसेच एअर इंडियाच्या क्रू मेंबर्सबद्दलचा तिचा अनुभव शेअर केला आहे.
बॉलीवूड अभिनेत्री सेलिना जेटलीने तिच्या अलीकडील पोस्टद्वारे अहमदाबाद विमान अपघाताबद्दल दुःख व्यक्त केले आणि एअर इंडियाच्या क्रू मेंबर्सने तिच्या दुःखात तिला कशी साथ दिली हे सांगितले.
१३ जून रोजी सेलिना जेटलीने एका फ्लाइटमधील तिचा फोटो शेअर केला आणि एतिहाद एअरवेजशी संबंधित एक किस्सा शेअर केला आणि सांगितले की, प्रवासादरम्यान एका एअरहोस्टेसने तिच्यावर ड्रिंकचे संपूर्ण ट्रे पाडले होते आणि ती पूर्णपणे भिजली. पण, तिच्या आईने तिला जे शिकवले होते ते आठवून तिने तिचा राग नियंत्रित केला. याबरोबरच ती म्हणाली की, जेव्हा एखादी दुर्घटना घडते तेव्हा ती भेदभाव करत नाही, ती इकॉनॉमी, बिझनेस किंवा फर्स्ट क्लासमधील व्यक्ती आहे.
विमान अपघातावर सेलिना बोलली
सेलिना म्हणाली, “या घटनेने मला आठवण करून दिली की, विमान हवेत असताना कोणताही भेदभाव न करता दुःखद घटना घडतात. तुम्ही इकॉनॉमीमध्ये आहात की बिझनेसमध्ये आहात की फर्स्ट क्लासमध्ये आहात हे महत्त्वाचे नाही. आपण सर्व एकाच आकाशात आहोत, एकाच आशेने आणि त्याच नाजूकपणाने बांधलेले आहोत. कधीकधी आपण आपले विशेषाधिकार बॅजसारखे घालतो; हे विसरून जातो की करुणा ही एकमेव जागा आहे, जी खरोखर महत्त्वाची आहे.”
अभिनेत्री पुढे म्हणाली, “एअर इंडियाच्या हृदयद्रावक अपघाताने माझे हृदय हेलावून टाकले. ज्यांनी आपले प्राण गमावले त्यांच्यासाठी, त्यांच्या प्रियजनांसाठी आणि ३५,००० फूट उंचीवर दररोज आपले सर्वोत्तम देणाऱ्या क्रूसाठी माझे हृदय दुखावले आहे.” तिने सांगितले की, एअर इंडियाचे क्रू मेंबर्स नेहमीच तिच्याशी खूप चांगले वागले आहेत. एकदा ती तिच्या जुळ्या मुलांसह एकटी प्रवास करत होती, तेव्हाही एका क्रू मेंबरने तिला मदत करण्याचा प्रयत्न केला.
एक प्रसंग आठवताना सेलिना म्हणाली, “मी फक्त १९ व्या वर्षी जमैकाहून न्यूयॉर्कला एकटी प्रवास करत होते. माझे मन तुटले होते. मला जेएफकेमध्ये एका व्यक्तीने सोडून दिले होते. मी त्याच्यावर खूप प्रेम करत होते. एअर इंडियाच्या एक वृद्ध क्रू मेंबरने माझा हात धरला होता आणि मी मुंबईपर्यंत त्यांचा हात धरून रडत राहिले. मी हे कधीही विसरले नाही.” सेलिनाने क्रू मेंबर्सना प्रोत्साहन दिले आणि पीडितांप्रती शोक व्यक्त केला.