deepali sayyed bogus married from charitable trust allegation former personal asstistant ssa 97 | Loksatta

“दीपाली सय्यद यांनी चॅरिटेबल ट्रस्टच्या माध्यमातून बोगस लग्न लावली”, माजी स्वीय्य सहाय्यकाचे गंभीर आरोप; राज्यपालांवर

“बोगस कामांसाठी राज्यपाल कोश्यारी दीपाली सय्यद यांना…”

“दीपाली सय्यद यांनी चॅरिटेबल ट्रस्टच्या माध्यमातून बोगस लग्न लावली”, माजी स्वीय्य सहाय्यकाचे गंभीर आरोप; राज्यपालांवर
दीपाली सय्यद ( लोकसत्ता संग्रहित छायाचित्र )

शिंदे गटात जाण्यासाठी अद्यापही वेटींगवर असणाऱ्या अभिनेत्री दीपाली सय्यद यांच्यावर गंभीर आरोप करण्यात आले आहेत. दीपाली सय्यद यांनी आपल्या चॅरिटेबल ट्रस्टच्या माध्यमाधून बोगस लग्न लावली आहेत. दीपाली सय्यद यांचे माजी स्वीय्य सहाय्यक यांनी हा आरोप केला आहे.

भाऊसाहेब शिंदे असे माजी स्वीय्य सहाय्यकाचे नाव आहे. भाऊसाहेब शिंदे यांनी ‘एबीपी माझा’शी बोलताना सांगितलं की, “दीपाली भोसले चॅरिटेबल ट्रस्टच्या माध्यमातून सय्यद यांनी हजारो कोटी रुपयांचं वाटप केलं. पण, ऑडिट रिपोर्ट मिळाल्यावर चॅरिटेबल ट्रस्टच्या अकाउंटमध्ये फक्त ९ हजार १८२ रुपये आढळून आले. मग बाकीची रक्कम दीपाली सय्यद यांनी कोठून दिली आणि कोठून आणली, याची आर्थिक गुन्हे शाखेने चौकशी करावी. चौकशी झाली नाहीतर उपमुख्यमंत्री देवेंद्र फडणवीस यांच्या सागर निवासस्थानासमोर आत्मदहन करणार,” असा इशारा शिंदेंनी दिला.

“दीपाली भोसले चॅरिटेबल ट्रस्टच्या माध्यमातून ९-९-२०२१ साली सांगलीत बोगस लग्न लावण्यात आली. २०१६ रोजी एका दाम्पत्याचे लग्न झालं होतं. त्यांना २०१८ साली अपत्य झालं. पण, त्यांचा विवाह दीपाली सय्यद आणि राज्यपाल यांच्या उपस्थितीत चॅरिटेबल ट्रस्टच्या माध्यमातून पुन्हा २०२१ साली लावला. बोगस कामांसाठी राज्यपाल कोश्यारी दीपाली सय्यद यांना सहकार्य करतात. दीपाली सय्यद यांच्यावर राज्यपाल का मेहेरबान आहेत, याची चौकशी राज्य शासनाने करावी,” अशी मागणीही भाऊसाहेब शिंदे यांनी केली.

तर, भाऊसाहेब शिंदे यांनी केलेले सर्व आरोप दीपाली सय्यद यांनी फेटाळले आहेत. ‘एबीपी माझा’शी बोलताना सय्यद यांनी सांगितलं, “माझ्यावर आणि माझ्या ट्रस्टवर झालेले आरोप अत्यंत चुकीचे आहेत. ज्यांनी माझ्यावर आरोप केलेत, त्यांना माझ्या नावावर पैसे घेताना मी पकडलं आहे. त्यामुळे मी त्यांना ट्रस्टवरून बाजूला केलं. हाच राग मनात धरून माझ्यावर आरोप करण्यात आले. मी याबाबत कायदेशीर मार्गाचा अवलंब करणार,” असे दीपाली सय्यद यांनी स्पष्ट केलं.

मराठीतील सर्व मनोरंजन ( Manoranjan ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

First published on: 07-12-2022 at 18:28 IST
Next Story
“नवे लक्ष्य २ मध्ये आपण असू का…” सोहम बांदेकरच्या ‘त्या’ पोस्टमुळे चाहते चिंतेत