Kantara Chapter 1 box office collection day 3 : दसऱ्याच्या मुहूर्तावर हिंदी, तसेच दाक्षिणात्य सिनेसृष्टीत अनेक धमाकेदार चित्रपट प्रदर्शित झाले आहेत. त्यांपैकी प्रदर्शित झालेल्या दोन मोठ्या चित्रपटांनी प्रेक्षकांचे लक्ष वेधले आहे. त्यामध्ये कन्नड सुपरस्टार ऋषभ शेट्टीचा ‘कांतारा चॅप्टर १’ आणि दुसरीकडे वरुण धवन व जान्हवी कपूरच्या ‘सनी संस्कारी की तुलसी कुमारी’चा समावेश आहे. दोन्ही चित्रपट बॉक्स ऑफिसवर धुमाकूळ घालत आहेत. मात्र, कमाईच्या बाबतीत ‘कांतारा चॅप्टर १’ने बाजी मारली आहे.
‘कांतारा चॅप्टर १’ने प्रदर्शनाच्या पहिल्या दिवसापासूनच बॉक्स ऑफिसवर आपले वर्चस्व दाखवले आहे. पहिल्याच दिवशी या चित्रपटाने ६१.८५ कोटी रुपयांची विक्रमी कमाई केली. दुसऱ्या दिवशी चित्रपटाच्या कमाईत थोडी घट झाली असली तरी दुसऱ्या दिवसाची कमाई ४३.६५ कोटी इतकी होती. त्यामुळे अवघ्या दोन दिवसांत चित्रपटाचा गल्ला १०५.५ कोटी पर्यंत पोहोचला.
‘सॅकनिल्क’च्या अहवालानुसार चित्रपटाने तिसऱ्या दिवशी ५५ कोटी रुपयांची कमाई केली. ‘कांतारा चॅप्टर १’ची भारतातील कमाई १६२.८५ कोटींवर पोहोचली आहे; तर जगभरातील कमाई २५० कोटींपेक्षा जास्त झाली आहे.
दुसरीकडे वरुण धवन आणि जान्हवी कपूर अभिनीत ‘सनी संस्कारी की तुलसी कुमारी’ने पहिल्या दिवशी ९.२५ कोटी कमावले; परंतु दुसऱ्या दिवशी चित्रपटाची कमाई घसरली. या चित्रपटाने फक्त ५.२५ कोटी कमावले. तिसऱ्या दिवशी ७.२५ कोटी कमावले. त्यानंतर चित्रपटाने भारतात २२ कोटी कमावले; तर जगभरात एकूण ३५ कोटी कमावले.
ऋषभ शेट्टीने ‘कांतारा चॅप्टर १’मध्ये केवळ मुख्य भूमिकाच साकारली नाही, तर दिग्दर्शनाची जबाबदारीही घेतली आहे. ‘कांतारा चॅप्टर १’ जगभरात कन्नड, हिंदी, तेलुगू, तमीळ व मल्याळम या पाच भाषांमध्ये प्रदर्शित झाला आहे. ऋषभ शेट्टी लिखित व दिग्दर्शित, ‘कांतारा चॅप्टर १’मध्ये रुक्मिणी वसंत, जयराम व गुलशन देवैया यांच्याही भूमिका आहेत. या चित्रपटाचं समीक्षक व प्रेक्षक कौतुक करीत आहेत.