Mahesh Manjrekar And Uddhav Thackeray Meeting : मनोरंजन विश्वातल्या अनेक कलाकार मंडळींचे राजकीय व्यक्तींबरोबर चांगले हितसंबंध असल्याचं अनेकदा पाहायला मिळालं आहे. त्यापैकी एक म्हणजे अभिनेते-दिग्दर्शक महेश मांजरेकर. महेश मांजरेकरांचे अनेक राजकीय व्यक्तींशी चांगले संबंध आहेत. राज ठाकरे हे महेश मांजरकरांचे चांगले मित्र आहेत, याबद्दल अनेक जणांना माहीत आहे. अशातच महेश मांजरेकरांनी त्यांचा उद्धव ठाकरेंबरोबरचा एक किस्सा सांगितला आहे.
उद्धव ठाकरे मुख्यमंत्री असताना महेश मांजरेकरांनी वर्षा बंगल्यावर त्यांची भेट घेतली होती. या भेटीचा खास किस्सा महेश मांजरेकरांनी नुकत्याच एका मुलाखतीत सांगितला आहे. महेश माजरेकरांचा ‘पुन्हा शिवाजीराजे भोसले’ हा सिनेमा लवकरच प्रेक्षकांच्या भेटीला येणार असून या निमित्ताने महेश मांजरेकर अनेक ठिकाणी मुलाखती देत आहेत. अशातच झी २४ तासला दिलेल्या मुलाखतीत महेश मांजरेकरांनी त्यांचा आणि उद्धव ठाकरेंच्या भेटीचा किस्सा शेअर केला आहे.
या मुलाखतीत महेश मांजरेकरांना त्यांच्या आवडत्या राजकीय व्यक्ती विचारण्यात आल्या. यावेळी महेश मांजरेकरांनी आवडत्या व्यक्तींची नावं घेत उद्धव ठाकरेंबद्दलही प्रतिक्रिया दिली. महेश मांजरेकर सांगतात, “कोणताच माणूस वाईट नसतो. कुणाचं राजकीय मत वगैरे असेल तर ते ठीक आहे, पण मी त्यात जात नाही. माझ्या मुलीनं ‘मेजर’ नावाचा सिनेमा केला होता, जो मेजर संदीप उन्नीकृष्णन यांच्या जीवनावर आधारित होता. त्या सिनेमात माझी मुलगी आणि तेलुगू एक नायक होता; तर त्या नायकानं माझ्या मुलीला सांगितलं की, तुझ्या बाबांना सांग मला उद्धव ठाकरे यांना भेटायचं आहे आणि माझ्या मुलीनं ते मला सांगितलं.”
उद्धव ठाकरेंना भेटायला गेलो तेव्हा…
यापुढे ते सांगतात, “त्यानंतर मी माझ्या एका मित्राला याबद्दल सांगितलं, मग त्यानं उद्धव ठाकरेंच्या सेक्रेटरींना फोनद्वारे विचारलं. मग त्यांनी वेळ विचारली. त्यावर मी म्हटलं की, १०-१५ मिनिटे लागतील. मग त्यांनी दुपारी १२.३० वाजताची वेळ दिली आणि मी म्हटलं की ते दिलेल्या वेळेत येतील. तर त्यांनी मला सांगितलं की, त्यांना मीसुद्धा त्यांच्याबरोबर हवा आहे. मग मी आणि माझ्याबरोबर आणखी दोघेजण दिलेल्या वेळेत वर्षा बंगल्यावर गेलो, तेव्हा उद्धव ठाकरे मुख्यमंत्री होते. मी आत गेलो आणि माझ्याबरोबरच्या दोघांना म्हटलं की, तुम्ही बाहेर वेटिंग रूममध्ये थांबा. मग मी, माझी मुलगी आणि तो नायक असे आम्ही तिघं त्यांना भेटायला गेलो.”
यापुढे महेश मांजरेकर म्हणाले, “तेव्हा उद्धव ठाकरेंबरोबर वहिनी आणि आदित्यसुद्धा होता. १५ मिनिटं ठरलेली आमची भेट पुढे २ तासांची झाली. आमच्यात छान चर्चा झाली. त्यानंतर वहिनी कशासाठी तरी बाहेर आल्या; तर त्यांना ती बाहेर बसलेली दोन माणसं दिसली. मग वहिनींनी त्या दोघांचंही आदरातिथ्य केलं, त्यांची काळजी घेतली. आमचा सकाळचा नाश्ता आणि मग दुपारचं जेवणही तिकडेच झालं.”