सेलिब्रिटी मंडळींना सर्वसामान्यांप्रमाणेच सार्वजनिक ठिकाणी विविध प्रसंगाचा सामना करावा लागतो. काही कलाकार स्वतःच्या गाडीने कामानिमित्त प्रवास करत असतात. इतकंच काय तर स्वतः गाडी चालवतात. सुप्रसिद्ध अभिनेत्री वंदना गुप्ते यांपैकीच एक आहेत. त्यांचा ‘बाईपण भारी देवा’ हा मराठी चित्रपट प्रदर्शनाच्या मार्गावर आहे. याचनिमित्त त्यांनी दिलेल्या मुलाखतीत एक प्रसंग सांगितला.
केदार शिंदे दिग्दर्शित ‘बाईपण भारी देवा’ येत्या ३० जूनला चित्रपटगृहांमध्ये दाखल होणार आहे. या चित्रपटाच्या टीमने ‘लोकसत्ता ऑनलाइन’च्या ‘डिजिटल अड्डा’ला हजेरी लावली होती. यावेळी नेहमीच बाईपण भारी कसं असतं? याचा एक खरा प्रसंग वंदना गुप्ते यांनी सांगितला. त्या म्हणाल्या, “मी आधी गाडी खूप वेगाने चालवायचे. पुरुष जर गाडी चालवत असेल आणि एखादी स्त्री त्याला ओव्हरटेक करुन गेली तर पुरुषांचा अहंकार दुखावतो”.
आणखी वाचा – Video : एकाच वेळी १०८ सुर्यनमस्कार, तरीही दमली नाही प्राजक्ता माळी, व्हिडीओ शेअर करत म्हणाली, “हा पुरावा…”
“एकदा मीही नाटकाचा प्रयोग झाल्यावर लिंक रोड मार्गाने माझ्या घरी जायला निघाले. सांताक्रुझ पोलिस ठाण्याजवळून सरळ गेलं की माझं घर होतं. पोलिस ठाण्याजवळच एका रिक्षावाल्याने मला डिवचलं. कारण मी त्याला ओव्हरटेक करुन पुढे निघून गेले होते. त्याने यावरुन मला शिवीगाळ करण्यास सुरुवात केली. मी त्याच्या रिक्षासमोरच माझी गाडी आडवी उभी केली”.
“गाडीमधून मी उतरले. रिक्षामध्ये बसलेले प्रवासीही गडबडले. मी रिक्षावाल्याला विचारलं, तू मला शिवी का दिली? तेव्हा तो स्वतःच म्हणाला, तुम्ही मला ओव्हरटेक केलं ना… मी रिक्षावाल्यासह त्यामध्ये बसलेल्या प्रवाश्यांनाही खाली उतरवलं. मला एक टेक्निक माहीत होती. तिच मी वापरली. मी रिक्षा उलटी केली आणि त्यातलं सगळं ऑईल बाहेर आलं. मी त्याच्याशी अधिक वाद घातला असता तसेच त्याला पोलिस ठाण्यातही घेऊन गेले असते. पण त्याचदिवशी रात्री माझी अमेरिकेची फ्लाइट होती. म्हणून मी त्या रिक्षावाल्याला सोडून दिलं”.