“तुमच्या गलिच्छ राजकारणात…”, अमेय खोपकरांची प्राजक्ता माळीचं नाव घेणाऱ्या सुरेश धस यांच्यावर टीका; म्हणाले, “हलकी प्रसिद्धी मिळवण्याचे…”

सुरेश धस यांचं हे वक्तव्य अभिनेत्रींवर खोटेनाटे आरोप करुन हलकी प्रसिद्धी मिळवण्याचा प्रकार असल्याचं अमेय खोपकर यांनी म्हटलं आहे.

हेही वाचा – Suresh Dhas: “प्राजक्ताताई माळीही परळीत येतात…”, परळी पॅटर्नचा उल्लेख करत सुरेश धस यांची धनंजय मुंडेंवर टीका

काय म्हणाले होते सुरेश धस?

परळीमध्ये विटभट्ट्या, जमिनी बळकावून त्यावर अवैध बांधकाम केले जाते आणि प्रचंड पैसा मिळवला जातो. त्याच पैशातून इव्हेंट मॅनेजमेंट केले जाते. “इव्हेंट मॅनेजमेंट पॉलिटिक्स ज्यांना करायचं असेल, त्यांनी परळीला यावं. शिक्षण घेऊन पूर्ण देशात त्याचा प्रसार करावा. सपना चौधरी, रश्मिका मंधाना, प्राजक्ता माळीसुद्धा आमच्याकडे येतात. जर कुणाला चित्रपट काढायचा असेल तर या अशा मोठ्या विभूतींवर काढता येईल. प्राजक्ताताई माळी सुद्धा आमच्या परळीत येतात. परळीचा हाही एक पॅटर्न आहे,” असं वक्तव्य सुरेश धस यांनी केलं.

हेही वाचा – जगभर गाजलेला All We Imagine As Light ओटीटीवर रिलीज होणार; कधी, कुठे पाहता येणार सिनेमा? वाचा

सुरेश धस यांच्या वक्तव्याबद्दल अमेय खोपकर म्हणाले…

“सुरेश धस, तुमच्या गलिच्छ राजकारणात आमच्या कलाक्षेत्रातील माता-भगिनींना ओढू नका. अशाप्रकारे माता-भगिनींची बदनामी करणं हे महाराष्ट्राच्या संस्कृतीला बट्टा लावणारं आहे. अभिनेत्रींवर खोटेनाटे आरोप करुन हलकी प्रसिद्धी मिळवण्याचे हे प्रकार त्वरित थांबलेच पाहिजेत,” अशी पोस्ट अमेय खोपकर यांनी एक्सवर केली आहे.

दरम्यान, सुरेश धस यांच्या वक्तव्याचा अनेक राजकीय नेते निषेध करत आहेत. अभिनेत्री प्राजक्ता माळी यासंदर्भात पत्रकार परिषद घेऊन धस यांच्या टीकेला उत्तर देणार आहे, अशी माहिती तिने लोकसत्ताशी बोलताना दिली.