मराठी सिनेसृष्टी गाजवणाऱ्या लोकप्रिय ज्येष्ठ अभिनेत्री निवेदिता सराफ यांचा आज वाढदिवस आहे. त्यानिमित्ताने निवेदिता यांना चाहते सोशल मीडियाद्वारे शुभेच्छा देताना दिसत आहेत. तसंच कलाकार मंडळीदेखील खास पोस्ट करत निवेदिता यांना वाढदिवसाच्या शुभेच्छा देताना पाहायला मिळत आहेत. ‘आई आणि बाबा रिटायर होत आहेत’ या मालिकेतील कलाकारांनी निवेदिता यांना वाढदिवसानिमित्ताने खास सरप्राइज दिलं आहे.
‘आई आणि बाबा रिटायर होत आहेत’ ही मालिका २ डिसेंबरपासून ‘स्टार प्रवाह’ वाहिनीवर सुरू झाली. अल्पावधीत या मालिकेने प्रेक्षकांची मनं जिंकली आहेत. या मालिकेत अभिनेत्री निवेदिता सराफ, मंगेश देसाई, हरीश दुधाडे, प्रतिक्षा जाधव, अदिश वैद्य, पल्लवी कदम पाहायला मिळत आहेत. ‘आई आणि बाबा रिटायर होत आहेत’ मालिकेत निवेदिता यांनी शुभांगी हे पात्र साकारलं आहे. या मालिकेला चांगला टीआरपी मिळत आहे. नुकतंच मालिकेच्या सेटवर निवेदिता सराफ यांचा वाढदिवस साजरा करण्यात आला. याचा व्हिडीओ सध्या व्हायरल होतं आहे.
‘आई आणि बाबा रिटायर होत आहेत’ या मालिकेतील कलाकारांनी निवेदित सराफांना वाढदिवसानिमित्ताने खास सरप्राइज दिलं. वाढदिवसानिमित्ताने त्यांची मेकअप रुम फुग्यांनी सजवली. याचा व्हिडीओ पल्लवी कदमने तिच्या इन्स्टाग्राम स्टोरीवर शेअर केला आहे. या व्हिडीओमध्ये, निवेदिता सराफ सरप्राइज पाहून भारावलेल्या दिसत आहेत.
दरम्यान, निवेदिता सराफ यांच्या कामाबद्दल बोलायचं झालं तर, सध्या त्या अभिनयबरोबर निर्माती म्हणूनही उत्तम काम करत आहेत. आजच त्यांचा ‘संगीत मानापमान’ चित्रपट प्रदर्शित झाला आहे. सुबोध भावे दिग्दर्शित या चित्रपटात निवेदिता यांनी महत्त्वाची भूमिका साकारली आहे. याशिवाय २४ जानेवारीला प्रदर्शित होणाऱ्या ‘फसक्लास दाभाडे’ चित्रपटात त्या पाहायला मिळणार आहेत. या चित्रपटात निवेदिता सराफ यांच्यासह अमेय वाघ, सिद्धार्थ चांदेकर, क्षिती जोग, राजसी भावे, मिताली मयेकर झळकणार आहेत.
© IE Online Media Services (P) Ltd