‘माझी तुझी रेशीमगाठ’ या मालिकेने प्रेक्षकांची मनं जिंकली होती. या मालिकेप्रमाणेच त्यातील कलाकारांनाही प्रेक्षकांचं भरभरुन प्रेम मिळालं. प्रार्थना बेहेरे व श्रेयस तळपदे या मालिकेत मुख्य भूमिकेत होते. मराठमोळी अभिनेत्री काजल काटे हिलाही याच मालिकेमुळे लोकप्रियता मिळाली.
मालिकांमध्ये काम करुन घराघरात पोहोचलेल्या काजलने नुकतंच स्वत:चं घर खरेदी केलं आहे. या नवीन घरात तिने पतीसह वास्तूशांतीची पूजाही केली आहे. काजलने इन्स्टाग्राम अकाऊंटवरुन नवीन घराचा व्हिडीओ शेअर केला आहे. या व्हिडीओत तिच्या आलिशान घराची झलक पाहायला मिळत आहे.
काजलने नवीन घराचा व्हिडीओ शेअर करत “घर…सुख कळले…प्रतिक काजल करुणा” असं कॅप्शन दिलं आहे. या व्हिडीओला तिने सुख कळले हे गाणंही दिलं आहे. काजलच्या या व्हिडीओवर प्रार्थना बेहेरेने कमेंट केली आहे. “अभिनंदन…तुला प्रेम आणि सुख मिळो” असं प्रार्थनाने कमेंटमध्ये म्हटलं आहे.
काजलच्या पोस्टवर कमेंट करत चाहत्यांनी तिला शुभेच्छा दिल्या आहेत. ती सध्या स्टार प्रवाह वाहिनीवरील ‘मुरांबा’ या मालिकेतून प्रेक्षकांचं मनोरंजन करत आहे.