‘झी मराठी’ वाहिनीवरील ‘सातव्या मुलीची सातवी मुलगी’ या मालिकेला सध्या प्रेक्षकांचा भरभरून प्रतिसाद मिळत आहे. मालिकेत येणारी रंजक वळणं आणि रहस्यमय कथानक यामुळे अल्पावधीतच ही मालिका प्रेक्षकांच्या पसंतीस उतरली आहे. मालिकेचं कथानक रंजक वळणावर असतानाच येत्या काही दिवसात एका नव्या सुप्रसिद्ध कलाकाराची मालिकेत एन्ट्री होणार आहे.
‘सातव्या मुलीची सातवी मुलगी’ या मालिकेत नेत्राची भूमिका साकारणारी अभिनेत्री तितीक्षा तावडेने यासंदर्भात पोस्ट शेअर केली आहे. लवकरच या मालिकेत ज्येष्ठ अभिनेते राजन ताम्हणे एन्ट्री घेणार आहेत. ते या मालिकेत नेमकी कोणती भूमिका साकारणार याबद्दल अद्याप कोणतीही माहिती समोर आलेली नाही.
राजन ताम्हणे यांनी यापूर्वी ‘ठिपक्यांची रांगोळी’ या मालिकेत अप्पूचे वडील कौशिक वर्तक यांची भूमिका निभावली होती. त्यांच्या या भूमिकेला प्रेक्षकांची पसंती मिळाली होती. याशिवाय गेल्यावर्षी प्रसारित होणाऱ्या उमेश कामत आणि मुक्ता बर्वेच्या ‘अजूनही बरसात आहे’ या मालिकेत ते नायिकेच्या वडिलांच्या (मुक्ता बर्वेचे ऑनस्क्रीन वडील) भूमिकेत झळकले होते.
‘सातव्या मुलीची सातवी मुलगी’ या रहस्यमय मालिकेत राजन ताम्हणे नेमकी कोणती भूमिका साकारणार याबद्दल प्रेक्षकांच्या मनात प्रचंड उत्सुकता निर्माण झाली आहे. ही मालिका सोमवार ते शनिवार रात्री १०.३० वाजता ‘झी मराठी’ वाहिनीवर प्रसारित केली जाते. यामध्ये तितीक्षा तावडे, अजिंक्य ननावरे, ऐश्वर्या नारकर, श्वेता मेहेंदळे हे कलाकार महत्त्वाच्या भूमिका साकारत आहेत.