तितीक्षा तावडेने ‘या’ क्षेत्रात घेतलं प्रशिक्षण! प्रमाणपत्रासह शेअर केला फोटो, म्हणाली, “हा प्रवास जीवन बदलणारा…”

मराठी मालिकाविश्वातून घराघरांत लोकप्रिय झालेली अभिनेत्री म्हणून तितीक्षा तावडेला ओळखलं जातं. गाजलेल्या मालिकांमध्ये काम केल्याने तिचा एक वेगळा चाहतावर्ग तयार झालेला आहे. अभिनेत्री सोशल मीडियावर सुद्धा कायम सक्रिय असते. कामाव्यतिरिक्त आपल्या वैयक्तिक आयुष्यातील अनेक गोष्टी तितीक्षा चाहत्यांबरोबर शेअर करते. तिचे युट्यूब ब्लॉग्स देखील सर्वांच्या पसंतीस उतरतात.

सध्या तितीक्षा एका खास गोष्टीमुळे चर्चेत आली आहे. ही लोकप्रिय अभिनेत्री आता योग प्रशिक्षक झाली आहे. याबद्दल तिने स्वत: इन्स्टाग्राम पोस्ट शेअर करत माहिती दिली आहे. या योग अभ्यासाने आयुष्याला कलाटणी मिळाली असं मत अभिनेत्रीने व्यक्त केलं आहे.

अभिनेत्री लिहिते, “आता मला अधिकृत प्रमाणपत्र मिळालं आहे… मी प्रचंड कृतज्ञ आहे. सराव, प्रशिक्षण ते आपलं उद्दिष्ट गाठण्यापर्यंतचा हा प्रवास आपलं जीवन बदलणारा आहे. या क्षणाची मी आतुरतेने वाट पाहत होते. आता मी प्रमाणित ‘हठ योग प्रशिक्षक’ आहे. या प्रवासाबद्दल माझ्या शिक्षकांचे व मित्रमंडळींचे खूप खूप आभार…”

तितीक्षाने प्रशिक्षण घेतलेल्या ‘हठ योग’चा अर्थ ‘ह’ म्हणजे सूर्य आणि ‘ठ’ म्हणजे चंद्र असा होतो. हा श्वासोच्छवासाचा शास्त्रोक्त अभ्यास आहे. याने मनाची एकाग्रता सुद्धा वाढण्यास मदत होते. तितीक्षा तावडेने शेअर केलेल्या पोस्टवर तिचा पती सिद्धार्थ बोडके याच्यासह ऋतुजा बागवे, ऐश्वर्या नारकर, अक्षया नाईक, मुग्धा गोडबोले, सुयश टिळक, अविनाश नारकर, हृता दुर्गुळे यांनी कमेंट्स करत अभिनेत्रीवर कौतुकाचा वर्षाव केला आहे.

दरम्यान, तितीक्षा तावडेच्या कामाबद्दल सांगायचं झालं तर, तिची प्रमुख भूमिका असलेल्या ‘सातव्या मुलीची सातवी मुलगी’ या मालिकेने डिसेंबर महिन्यात प्रेक्षकांचा निरोप घेतला. आता अभिनेत्री भविष्यात कोणत्या नव्या प्रोजेक्टमध्ये झळकणार याची चाहते आतुरतेने वाट पाहत आहेत.