‘झी मराठी’च्या नव्या मालिकेत झळकणार ‘हे’ कलाकार! ‘रात्रीस खेळ चाले’ फेम अभिनेता साकारणार प्रमुख भूमिका, पाहा प्रोमो

‘सावळ्याची जणू सावली’ या मालिकेचा पहिला प्रोमो काही दिवसांपूर्वीच प्रेक्षकांसमोर आला होता. यामध्ये ‘काव्यांजली’ फेम अभिनेत्री प्राप्ती रेडकर प्रमुख भूमिकेत झळकणार असल्याचं स्पष्ट झालं होतं. परंतु, मालिकेत इतर कोणते कलाकार झळकणार याची प्रेक्षक आतुरतेने वाट पाहत होते. अखेर नुकत्याच प्रदर्शित झालेल्या दुसऱ्या प्रोमोमध्ये मालिकेची संपूर्ण स्टारकास्ट समोर आलेली आहे.

हेही वाचा : Video: “मला अजिबात पटलेलं नाही”, अंकिताने धनंजयला नॉमिनेट केल्यामुळे भडकली सोनाली पाटील, म्हणाली, “तुला जान्हवीबद्दल…”

मालिकेच्या नव्या प्रोमोमध्ये मुख्य नायक त्याचा वाढदिवस साजरा करत असल्याचं पाहायला मिळत आहे. याच नायकाची भूमिका अभिनेता साईंकित कामत साकारत आहे. यापूर्वी त्याने ‘रात्रीस खेळ चाले’, ‘तुझं माझं ब्रेकअप’ अशा बऱ्याच मालिकांमध्ये काम केलेलं आहे. नायकाला त्याची आई वाढदिवसानिमित्त आलिशान गाडी गिफ्ट करते. परंतु, या गाडीवर डेंट पडतो त्यामुळे नवीन गाडी आणा असं ती सांगते. “मी माझ्या मुलासाठी सुंदर सून शोधणार” असं ती सर्व पाहुण्यांना सांगते. यावरून अभिनेत्री सुलेखा तळवलकर सासूची भूमिका साकारणार असल्याचं स्पष्ट झालं आहे.

‘सावळ्याची जणू सावली’ मालिकेत झळकणार हे कलाकार

प्राप्ती रेडकर, साईंकित कामत, सुलेखा तळवलकर यांच्याशिवाय या मालिकेत वीणा जगताप, गौरी करण, आशिष कुलकर्णी हे कलाकार देखील महत्त्वाच्या भूमिका साकारणार आहेत. “सावली बदलेल का सौंदर्याची परिभाषा…?” असं कॅप्शन देत हा प्रोमो ‘झी मराठी’ वाहिनीवर शेअर करण्यात आला आहे. नेटकऱ्यांनी या नव्या प्रोमोवर कौतुकाचा वर्षाव केला आहे.

हेही वाचा : Sonali Kulkarni : “अनेकदा वाटतं मुंबईतून मराठी माणसं संपत चालली आहेत का? पण..”, सोनाली कुलकर्णीचं वक्तव्य चर्चेत

दरम्यान, ‘सावळ्याची जणू सावली’ ही मालिका आता केव्हा व कुठे सुरू होणार याबद्दल अद्याप माहिती देण्यात आलेली नाही. त्यामुळे या मालिकेची सगळे प्रेक्षक आतुरतेने वाट पाहत आहेत. येत्या काळात सुरू होणारी ‘सावळ्याची जणू सावली’ ही नवीन मालिका ‘झी बांगला’वरील ‘कृष्णकोली’ या मालिकेचा रिमेक असणार आहे. लवकरच या मालिकेची तारीख अन् वेळ जाहीर करण्यात येईल.