मुंबई : नुकत्याच संपलेल्या वैद्यकीय अभ्यासक्रमाच्या चौथ्या फेरीत २१९ विद्यार्थ्यांनी प्रवेश घेतले असून चौथ्या फेरीसाठी ३८७ जागा रिक्त राहिल्या आहेत. यामध्ये सरकारी महाविद्यालयामध्ये ३७ जागा तर खासगी महाविद्यालयामध्ये ३५० जागा रिक्त राहिल्या आहेत. तसेच तिसऱ्या फेरीत प्रवेश नाकारलेले ३८७ विद्यार्थी हे वैद्यकीय प्रवेश प्रक्रियेतून बाद होणार आहेत. या विद्यार्थ्यांनी प्रवेश नाकारल्याने चौथ्या फेरीसाठी ३८७ जागा रिक्त राहिल्या असून चौथ्या फेरीसाठी विद्यार्थ्यांमध्ये चुरस वाढण्याची शक्यता आहे.

राज्यामध्ये वैद्यकीय अभ्यासक्रमाच्या पहिल्या फेरीसाठी उपलब्ध असलेल्या ८ हजार १३८ जागांवर ६ हजार ८४८ विद्यार्थ्यांनी प्रवेश घेतले होते. त्यामुळे दुसऱ्या फेरीसाठी १ हजार २९० जागा रिक्त राहिल्या होत्या. मात्र दुसऱ्या फेरीपूर्वी राष्ट्रीय आयुर्विज्ञान आयोगाअंतर्गत असलेल्या वैद्यकीय समुपदेशन समितीने राज्यामध्ये खासगी व सरकारी महाविद्यालयांतर्गत २०० जागांना मान्यता दिली. त्यामुळे दुसऱ्या फेरीत प्रवेशासाठी १ हजार ४९० जागा उपलब्ध झाल्या होत्या. वैद्यकीय अभ्यासक्रमाची दुसरी फेरी २६ सप्टेंबर ते २ ऑक्टोबर या कालावधीत राबवण्यात आली. या फेरीनंतर तिसऱ्या फेरीसाठी ६०६ जागा रिक्त राहिल्या होत्या. त्यात सरकारी महाविद्यालयात १३८ तर खासगी महाविद्यालयामध्ये ४६८ जागा होत्या. तिसऱ्या फेरीसाठी उपलब्ध असलेल्या सर्व जागांवर विद्यार्थ्यांना प्रवेशाची संधी उपलब्ध करून देण्यात आली होती. मात्र तिसऱ्या फेरीमध्ये वैद्यकीय अभ्यासक्रमासाठी २१९ जागांवरच विद्यार्थ्यांनी प्रवेश घेतले. त्यात सरकारी महाविद्यालयात १०१ तर खासगी महाविद्यालयांत ११८ विद्यार्थ्यांनी प्रवेश घेतले. त्यामुळे चाैथ्या फेरीसाठी ३८७ जागा रिक्त आहेत. रिक्त राहिलेल्या जागांमध्ये सरकारी महाविद्यालयांत ३७ तर खासगी महाविद्यालयात ३५० जागा रिक्त आहेत. यामध्ये तिसऱ्या फेरीदरम्यान नवीन मान्यता मिळालेल्या खासगी महाविद्यालयांमधील जागा वाढण्याची शक्यता आहे. वैद्यकीय अभ्यासक्रमाच्या प्रवेश प्रक्रियेच्या नियमानुसार तिसऱ्या फेरीत प्रवेश नाकारलेले ३८७ विद्यार्थी हे प्रवेश फेरीतून बाद होणार आहेत.

दंत अभ्यासक्रमाच्या ५०८ जागा रिक्त

दंत अभ्यासक्रमाच्या पहिल्या फेरीत ९६१, तर दुसऱ्या फेरीत ८६६ विद्यार्थ्यांनी प्रवेश घेतल्याने तिसऱ्या फेरीसाठी ८९१ जागा उपलब्ध झाल्या होत्या. यामध्ये खासगी महाविद्यालयांमध्ये ८३८ तर सरकारी महाविद्यालयांमध्ये ५३ जागा रिक्त राहिल्या होत्या. तिसऱ्या फेरीत दंत अभ्यासक्रमाला ३८३ विद्यार्थ्यांनी प्रवेश घेतल्याने ५०८ जागा रिक्त राहिल्या आहेत. त्यात सरकारी महाविद्यालयात २६ तर खासगी महाविद्यालयात ४८२ जागा रिक्त आहेत.