महाराष्ट्रात बुलेट ट्रेनसाठी ९८ टक्के भूसंपादन

राज्यात मुंबई-अहमदाबाद बुलेट ट्रेन प्रकल्पासाठी लागणाऱ्या ४३०.४४ हेक्टरपैकी ४२२.७२ हेक्टर जमीन संपादित करण्यात आली आहे. म्हणजेच राज्यात ९८.२० टक्के भूसंपादन पूर्ण झाले आहे. मुंबईतील ४.८२ हेक्टर जागा संपादित करण्यात आली आहे. पालघर जिल्ह्यात २८८.७७ हेक्टरपैकी २८५.९९ हेक्टर, तर ठाणे जिल्ह्यात १३६.८५ हेक्टरपैकी १३१.९१ हेक्टर म्हणजेच ९६.४२ टक्के जागा संपादित करण्यात आली आहे..

महाराष्ट्र, गुजरात, दादरा-नगर हवेलीची मिळून सरासरी ९८.६८ टक्के भूसंपादन झाल्याचे नॅशनल हायस्पीड रेल्वे कॉर्पोरेशनच्या अधिकाऱ्यांनी सांगितले. यापैकी गुजरातमध्ये ९८.८७ टक्के आणि दादरा-नगर हवेलीतील १०० टक्के जागा संपादित झाली आहे. गुजरातमध्ये पूल उभारण्यासाठी पाया, गर्डरची कामे वेगाने सुरू असल्याची माहिती या अधिकाऱ्याने दिली. १४.३६ किलोमीटर पाया आणि १५ किलोमीटरपर्यंतचे गर्डर टाकण्यात आले आहेत.

हेही वाचा >>> मुंबई : महाविद्यालयात प्रवेश हवाय…; फसवणुकीपासून सांभाळा

राज्यातील सत्तांतरानंतर मुंबई-अहमदाबाद बुलेट ट्रेन प्रकल्पाला गती दिली जात आहे. प्रकल्पातील जमीन संपादनासाठी ३१ डिसेंबर २०१८ पर्यंतची मुदत होती. या प्रकल्पातील एकूण भूसंपादनासाठी ३१ मार्च २०१९ ही नवीन मुदत निश्चित केली होती. परंतु या मुदतीतही हे काम पूर्ण करता आले नाही. त्यानंतर वेळोवेळी नवीन अंतिम मुदत जाहीर करण्यात आली. महाराष्ट्रात गेल्या दोन वर्षापेक्षाही अधिक काळापासून केंद्र आणि राज्य सरकारमधील अंतर्गत वादामुळे प्रकल्पाचे काम संथगतीने सुरू होते. जून २०२२ मध्ये राज्यात ७१ टक्के भूसंपादन झाले होते. मात्र आता प्रकल्पाचे भूसंपादन वेगाने होत आहे. शिवाय अहमदाबाद – मुंबई बुलेट ट्रेन प्रकल्पात सुरुवातीचे स्थानक असलेल्या वांद्रे कुर्ला संकुल स्थानकाच्या बांधकामासाठी नामांकीत कंपन्या इच्छुक आहेत. स्थानकाचा आराखडा व बांधकामासाठी नॅशनल हायस्पीड रेल कॉर्पोरेशन लिमिटेडने तांत्रिक निविदा मागविल्या होत्या. त्यालाही चांगला प्रतिसाद मिळाला. तसेच वांद्रे कुर्ला संकुल – शिळफाटा या २१ किलोमीटर लांबीच्या भुयारी मार्गासाठी निविदा प्रक्रिया राबविण्यात येत आहे. बहुचर्चित ५०८ किलोमीटर लांबीच्या मुंबई – अहमदाबाद बुलेट ट्रेन मार्गांपैकी ३५० किलोमीटर लांबीचा वापी – अहमदाबाद मार्ग येत्या तीन – वर्षानंतर प्रवाशांच्या सेवेत दाखल करण्याचे उद्दिष्ट आहे.