मुंबई : महाराष्ट्र चित्रपट, रंगभूमी आणि सांस्कृतिक विकास महामंडळाने सुरू केलेल्या चित्रपट रसास्वाद मंडळातर्फे दिवाळीच्या पूर्वसंध्येला अनंत माने निर्मित व दिग्दर्शित ‘अवघाचि संसार’ चित्रपटाचे प्रदर्शन करण्यात येणार आहे.
एनएफडीसी – एनएफएआय यांच्या विशेष सहकार्याने रसिकांना १७ ऑक्टोबर २०२५ रोजी दुपारी ४ वाजता प्रभादेवी येथील पु. ल. देशपांडे महाराष्ट्र कला अकादमी संकुलातील लघु नाट्यगृहात ‘अवघाचि संसार’ हा चित्रपट पाहण्याची संधी मिळणार आहे.
‘अवघाचि संसार’ हा मराठी चित्रपट १९६० रोजी प्रदर्शित झाला आणि प्रचंड गाजला होता. ‘जे वेड मजला लागले’, ‘रूपास भाळलो मी’ अशी प्रसिद्ध अजरामर गाणी या चित्रपटात आहेत. सुप्रसिद्ध अभिनेत्री दिवंगत जयश्री गडकर व अभिनेते रमेश देव यांनी ‘अवघाचि संसार’ चित्रपटात प्रमुख भूमिका साकारली असून दामू अण्णा मालवणकर, पद्मा चव्हाण, राजा गोसावी, शरद तळवळकर यांसारख्या दिग्गज कलाकारांच्या अभिनयाने हा चित्रपट सजलेला आहे. हा चित्रपट महामंडळाच्या सभासदांसह सर्व रसिकांना विनामूल्य पाहता येणार असून ‘प्रथम येणाऱ्यास प्राधान्य’ या तत्वावर आसन व्यवस्था असणार आहे.