मुंबई : राष्ट्रीय आयुर्विज्ञान आयोगाच्या वैद्यकीय समुपदेशन समितीने वैद्यकीय अभ्यासक्रमाच्या पहिल्या फेरीसाठीच्या नोंदणी प्रक्रियेला मुदतवाढ दिल्याने राज्य कोट्यांतर्गत राबविण्यात येणाऱ्या प्रवेश प्रक्रियेच्या नोंदणीसाठी राज्य सामाईक प्रवेश परीक्षा कक्षाकडून (सीईटी कक्ष) ४ ऑगस्टपर्यंत मुदतवाढ देण्यात आली. ३१ जुलैपर्यंत या अभ्यासक्रमासाठी जवळपास ६१ हजार विद्यार्थ्यांनी नोंदणी केलेली आहे.

नीट यूजी २०२५ परीक्षेचा निकाल १४ जून रोजी जाहीर झाल्यानंतर तब्बल एक महिन्याने वैद्यकीय समुपदेशन समितीने (एमसीसी) अखिल भारतीय कोट्याचे वेळापत्रक जाहीर केले. त्याचवेळी राज्य कोट्यातील प्रवेश प्रक्रिया राबविण्यांसदर्भातही सूचना दिल्या होत्या. त्यानुसार राज्य सामाईक प्रवेश परीक्षा कक्षाने राज्य कोट्याअंतर्गत एमबीबीएस, बीडीएस, बीएएमएस, बीएचएमएस, बीयूएमएस, बीएनवायएस, बीपीटीएच, बीओटीएच, बीएएसएलपी या अभ्यासक्रमासाठी २३ ते ३० जुलैदरम्यान नोंदणी प्रक्रिया सीईटी सेलने सुरू केली. मात्र ३० जुलै रोजी केंद्रीय कोट्यांतर्गत प्रवेश प्रक्रियेसाठी एमसीसीने मुदतवाढ देण्याचा निर्णय जाहीर केला. या निर्णयाची अंमलबजावणी करत सीईटी कक्षाने राज्यांतर्गत प्रवेशासाठी नोंदणी करण्यासाठी ४ ऑगस्टपर्यंत मुदतवाढ दिली.

या कालावधीमध्ये नोंदणी करणाऱ्या विद्यार्थ्यांना ५ ऑगस्ट रोजी रात्री ११ वाजून ५९ मिनिटांपर्यंत कागदपत्रे जमा करून शुल्क भरता येणार आहे. नोंदणी केलेल्या विद्यार्थ्यांपैकी एमबीबीएस व बीडीएस अभ्यासक्रमासाठी अर्ज केलेल्या विद्यार्थ्यांची गुणवत्ता यादी व उपलब्ध जागांचा तपशील ६ ऑगस्ट राेजी जाहीर करण्यात येणार आहे. तसेच ६ ते ९ ऑगस्टदरम्यान या विद्यार्थ्यांना महाविद्यालयांचा पसंतीक्रम भरता येणार आहे. एमबीबीएस व बीडीएस या अभ्यासक्रमाच्या पहिल्या फेरीची निवड यादी ११ ऑगस्ट रोजी जाहीर होणार असून, विद्यार्थांना १२ ते १७ ऑगस्ट या कालावधीत प्रत्यक्ष महाविद्यालयात जाऊन प्रवेश घ्यायचा आहे.

हेही वाचा

वैद्यकीय अभ्यासक्रम असलेल्या राज्यातील विविध अभ्यासक्रमांसाठी एकूण ४८ हजार ०३९ जागा उपलब्ध आहेत. यामध्ये आयुर्वेद पदवी (बीएएमएस) अभ्यासक्रमासाठी ९ हजार ७३१ जागा, होमिओपॅथी (बीएचएमएस) अभ्यासक्रमासाठी ४ हजार ४१७, एमबीबीएससाठी ८ हजार १४१ जागा आहेत. यात ३६ शासकीय महाविद्यालयांत ४ हजार १५७ जागा असून, ५ अनुदानित संस्थांमध्ये ७६४ आणि २३ खासगी संस्थांमध्ये ३ हजार २२० जागा आहेत. दंतशास्त्र (बीडीएस) अभ्यासक्रमासाठी एकूण २ हजार ६७५ जागा उपलब्ध आहेत.