तंत्रज्ञानाच्या मदतीने ५९ वर्षीय व्यक्तीचे नग्न छायाचित्र बनवून त्याच्याकडे खंडणी मागितल्याचा प्रकार उघडकीस आला आहे. आरोपीने संबंधीत छायाचित्र मित्र व कटुंबातील व्यक्तींना पाठवणाची धमकी देऊन तक्रारदाराकडून खंडणीची रक्कम उकळल्याचे निष्पन्न झाले आहे. याप्रकरणी खार पोलिसांनी खंडणी व माहिती तंत्रज्ञान प्रतिबंधक कायद्याअंतर्गत गुन्हा दाखल केला आहे. हेही वाचा- बेस्टच्या नोटीसवर कंत्राटदाराचे मौन; मिनी बसची संख्या रोडावली खार पश्चिम येथील रहिवासी असलेल्या तक्रारदारांचा चेहरा नग्न शरीरावर लावून आरोपीने एक चित्रफीत तयार केली. ती चित्रफीत तक्रारदाराला पाठवून खंडणीची मागणी करण्यात आली. खंडणी न दिल्यास चित्रफीत समाज माध्यमांवर प्रसारित करण्याची धमकी आरोपीने दिली. हा प्रकार ४ ऑक्टोबरला घडल्यानंतर तक्रारदारांनी काही रक्कम आरोपीने सांगितलेल्या बँक खात्यावर जमा केली. आरोपीने पुन्हा पैशांची मागणी करण्यास सुरूवात केली. रक्कम न दिल्यास मित्र व नातेवाईकांना चित्रफीत दाखवण्याची धमकी दिली. तक्रारदाराने आतापर्यंत ३१ हजार रुपये आरोपीला दिले. मात्र वारंवार पैशांची मागणी होत असल्यामुळे अखेर त्यांनी याप्रकरणी खार पोलिसांकडे तक्रार केली. पोलिसांनी खंडणी व माहिती तंत्रज्ञान प्रतिबंधक कायद्याअंतर्गत गुन्हा दाखल करून तपासाला सुरूवात केली आहे. हेही वाचा- Mumbai Rains: ठाण्यात वीजांच्या कडकडाटसह तुफान पाऊस; मुंबई, डोंबिवली, नवी मुंबईतही कोसळला, तासभर जोरदार बरसणार प्राथमिक तपासानुसार आरोपीने चार विविध क्रमांकावरून तक्रारदाराशी दूरध्वनी व व्हॉट्सॲपद्वारे संपर्क साधला आहे. याप्रकरणी सायबर फसवणूक करणाऱ्या सराईत भामट्यांचा हात असल्याचा पोलिसांना संशय आहे.
