मुंबई : उपनगरीय लोकलवर दगडफेकीच्या घटना सुरूच आहेत. रे रोड रेल्वे स्थानकात झालेल्या दगडफेकीत २८ वर्षीय प्रवासी तरुणी जखमी झाली. आठवड्याभरतील ही तिसरी घटना आहे. या तरुणीवर केईएम रुग्णालयात उपचार करण्यात आले.
मुंबई उपनगरीय लोकलमधून दररोज मोठ्या संख्येने प्रवासी प्रवास करतात. मात्र अधूनमधून काही भागांतून लोकलवर दगडफेकीच्या घटना घडतात. या घटनांमुळे प्रवाशांना गंभीर दुखापत झाली आहे. अनेकांना डोक्याला किंवा डोळ्याला इजा झाल्याच्या नोंदी आहेत. शिवडी आणि वडाळा रेल्वे स्थानकात धावत्या लोकलवर दगडफेकीच्या दोन घटना ताज्या असताना शुक्रवारी रे रोड आणि कॉटन ग्रीन स्थानकांदरम्यान धावत्या लोकलवर दगडफेकीची आणखी एक घटना घडली. या घटनेत २८ वर्षीय महिला प्रवासी जखमी झाली. एकाच आठवड्यात लोकलवर दगडफेकीची ही तिसरी घटना आहे.
२८ वर्षीय तरुणी जखमी
परळ येथे वास्तव्यास असलेली २८ वर्षीय तरुणी एका खासगी कंपनीत काम करते. तिने शुक्रवारी संध्याकाळी सीएसएमटी – गोरेगाव हार्बर मार्गावरील धीमी लोकल पकडली होती. मोटरमन जवळील महिलांच्या डब्यातून ती प्रवास करीत होती. रे रोड स्थानक जातात ती कॉटन ग्रीनला उतरण्यासाठी दरवाज्याजवळ आली. अचानक लोकलच्या दिशेने भिरकावलेला दगड तिच्या डोक्याला लागला. कॉटन ग्रीन स्थानकातील स्टेशन मास्तरांनी तिच्यावर प्रथमोपचार केले. त्यानंतर पुढील उपचारासाठी तिला केईएम रुग्णालयात दाखल करण्यात आले. संबंधित प्रवासी महिला उपचारानंतर पोलीस ठाण्यात गेली आणि तिने याप्रकरणी तक्रार केली. तिच्या तक्रारीच्या आधारे गुन्हा दाखल करण्यात येईल, असे वडाळा रेल्वे पोलिसांनी सांगितले.
यापूर्वीच्या दगडफेकीच्या घटना
१८ सप्टेंबर २०२५
दगडफेकीची पहिली घटना गुरूवार १८ सप्टेंबर रोजी घडली. वडाळा पूर्व येथे राहणाऱ्या अनुराधा साव (३९) गुरूवार १८ सप्टेंबर रोजी सीएसएमटी स्थानकातून संध्याकाळी ७ वाजून ७ मिनिटांच्या सीएसएमटी-गोरेगाव धीम लोकलमध्ये चढल्या होत्या. महिलांच्या शेवटच्या डब्यातून त्या प्रवास करत होत्या. शिवडी रेल्वे स्थानक ओलांडल्यानंतर त्या वडाळा स्थानकात उतरण्यासाठी दरवाज्याजवळ आल्या. संध्याकाळी साडेसातच्या दरम्यान रेल्वे रुळाजवळ उभ्या असलेल्या एका व्यक्तीने त्यांच्या दिशेने दगड फेकला. हा दगड आधी त्यांच्या मोबाइलला लागला आणि नंतर थेट त्यांच्या डाव्या डोळ्यावर आदळला. यात त्यांना किरकोळ दुखापत झाली. त्यांना उपचारसाठी लोकमान्य टिळक रुग्णालयात दाखल करण्यात आले. उपचारानंतर त्यांनी वडाळा रेल्वे पोलीस ठाण्यात परत येऊन तक्रार दाखल केली.
२२ सप्टेंबर २०२५
दगडफेकीची दुसरी घटना वडाळा रेल्वे स्थानकाजवळ सोमवार २२ सप्टेंबर रोजी घडली. हर्षदा पवार (२१) ही तरुणी सोमवारी संध्याकाळी आपल्या कार्यालयातून परत येत होती. हर्षदा गर्दीमुळे गाडीच्या फूटबोर्डवर उभी होती. कॉटन ग्रीन आणि रे रोड स्थानकांच्या दरम्यान गाडी असताना, अज्ञात व्यक्तीने अंधारात फेकलेला दगड तिच्या चेहऱ्यावर आदळला. तिच्यावर रुग्णालयात उपचार करण्यात आले.