मुंबई : कराटेचे प्रशिक्षण देणाऱ्या प्रशिक्षकाने १२ वर्षीय विद्यार्थिनीवर लैंगिक अत्याचार केल्याचे उघडकीस आले आहे. याप्रकरणी शिवाजी पार्क पोलिसांनी २२ वर्षीय आरोपी प्रशिक्षकाला अटक केली आहे. आरोपीने पीडित मुलीला धमकावून तिच्यावर अत्याचार केल्याचा आरोप तक्रारीत करण्यात आला आहे. याप्रकरणी २२ वर्षीय आरोपीविरोधात बलात्कार व बालकांचे लैंगिक अत्याचारापासून संरक्षण कायद्याअंतर्गत गुन्हा दाखल करण्यात आला आहे. आरोपीने इतरही मुलींसोबत असा प्रकार केला आहे का ? याबाबतही पोलीस तपास करीत आहेत.

आरोपी गेल्या सात महिन्यांपासून पीडित मुलीला त्रास देत होता. आरोपी मुलीने त्याचे ऐकले नाही, तर ती अश्लील कृत्य करीत असल्याचे खोटे आईला सांगेन, असे आरोपीने धमकावले होते. तसेच हा प्रकार कोणाला सांगितल्यास पीडित मुलीच्या आईलाही त्रास देण्याची धमकी आरोपीने दिली होती. त्यामुळे पीडित मुलगी घाबरली होती. आरोपी गेल्या काही महिन्यांपासून वारंवार पीडित मुलीसोबत अश्लील कृत्य करीत होता.

तात्काळ गुन्हा दाखल

या सर्व प्रकारामुळे पीडित मुलगी घाबरली होती. कराटे क्लासला जाणे टाळत होती. अखेर पीडित मुलीच्या आईने तिच्या वगण्यातील बदल हेरून तिला विश्वासात घेऊन विचारणा केली. त्यावेळी पीडित मुलीने तिच्यासोबत घडलेल्या प्रकाराची माहिती आईला दिली. त्यामुळे पीडित मुलीच्या आईला धक्काच बसला. तिने कुटुंबातील सदस्यांना हा प्रकार सांगून आरोपी प्रशिक्षकाविरोधात पोलिसांकडे तक्रार करण्याचा निर्णय घेतला. त्यांनी सोमवारी रात्री याप्रकरणी शिवाजी पार्क पोलिसांकडे तक्रार केली. या प्रकरणाचे गांभीर्य लक्षात घेऊन पोलिसांनी २२ वर्षीय आरोपीविरोधात भारतीय न्याय संहिता कलम ६४, ६५ (१), ३५१ (३) व बालकांचे लैंगिक अत्याचारापासून संरक्षण (पोक्सो) कायद्यातील कलम ४, ८, १२ अंतर्गत गुन्हा दाखल केला.

हेही वाचा

गुन्हा दाखल झाल्यानंतर तात्काळ पोलीस पथकाने आरोपी वास्तव्यास असलेल्या परिसरात पोहोचले. त्यावेळी आरोपी घरीच उपस्थित होता. तेथून आरोपीला तात्काळ अटक करण्यात आली. आरोपी गेल्या वर्षभरापासून कराटे शिकवत आहे. आरोपीने इतर मुलींसोबत अश्लील कृत्य केले आहे का ? याबाबत पोलीस तपास करीत आहेत.

अल्पवयीन मुलांविरोधात घडलेल्या गुन्ह्यांमध्ये वाढ

मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १३४१ गुन्ह्यांची नोंद झाली होती. २०२३ पोक्सो कायद्याअंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे. २०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांची उकल होण्याचे प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील अत्याचाराच्या घडनांमध्ये बहुसंख्य आरोपी परिचित व्यक्त आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.