भायखळा विधानसभा मतदारसंघातून विजय मिळवून शिवसेनेच्या यामिनी जाधव यांनी इतिहास रचला आहे. पहिल्यांदाच शिवसेनेने भायखळयाची जागा जिंकली आहे. हा तोच मतदारसंघ आहे जिथून १९४६ साली पाकिस्तानचे संस्थापक मोहम्मद अली जिना यांनी निवडणूक जिंकली होती. या विजयामुळे यामिनी जाधव यांना मंत्रिपदाची लॉटरी लागू शकते.
वाणिज्य शाखेच्या पदवीधर असलेल्या यामिनी जाधव या माजी नगरसेविका आहेत. त्यांना एकूण ५१ हजार १८० मते मिळाली. त्यांनी एआयएमआयएमच्या वारिस पठाण यांचा तब्बल २०,०२३ मतांनी पराभव केला. काँग्रेसचे मधु चव्हाण २४,१३९ मते मिळवून तिसऱ्या स्थानावर राहिले. अंडरवर्ल्ड डॉन अरुण गवळी यांची मुलगी गीता गवळी सुद्धा अखिल भारतीय सेनेच्या तिकीटावर निवडूणक रिंगणात होत्या.
मी भायखळयाच्या जनेतची आभारी आहे. त्यांनी माझा विजय सुनिश्चित केला. मी सर्व समाजांसाठी काम करेन. अंमलीपदार्थांची सवय सोडवणाऱ्या केंद्रांची स्थापना करेन. जुन्या इमारतींचा प्रश्नही या भागात आहे. त्यांच्या पूनर्बांधणीसाठी विशेष मेहनत घेईन असे यामिनी जाधव यांनी विजयानंतर माध्यमांशी बोलताना सांगितले. यामिनी जाधव यांना एकूण ४१ टक्के मते मिळाली. त्यांचे पती यशवंत जाधव हे मुंबई महापालिकेत स्थायी समितीचे अध्यक्ष आहेत.
भायखळा विधानसभा मतदारसंघ दक्षिण मुंबई लोकसभा मतदारसंघाचा भाग आहे. शिवसेनेचे अरविदं सावंत इथून खासदार आहेत. सलग दुसऱ्यांदा त्यांनी लोकसभेची निवडणूक जिंकली.