मुंबई : वीरमाता जिजाबाई भोसले वनस्पती उद्यान व प्राणिसंग्रहालय (राणीची बाग) साप्ताहिक सुट्टीनिमित्त दर बुधवारी बंद असते. परंतु, येत्या बुधवारी, म्हणजेच २७ ऑगस्ट रोजी गणेश चतुर्थीनिमित्त सार्वजनिक सुट्टी आहे. असे असले तरी त्या दिवशीही राणीची बाग मुंबईकरांसाठी खुली राहणार आहे. त्याऐवजी दुसऱ्या दिवशी म्हणजेच गुरुवार, २८ ऑगस्ट रोजी उद्यान बंद ठेवण्यात येणार आहे.
भायखळा (पूर्व) परिसरातील वीरमाता जिजाबाई भोसले वनस्पती उद्यान व प्राणिसंग्रहालय साप्ताहिक सुट्टीनिमित्त दर बुधवारी बंद असते. मात्र, महानगरपालिकेने यापूर्वी मंजूर केलेल्या एका ठरावानुसार, बुधवारी सार्वजनिक सुट्टी आल्यास त्यादिवशी उद्यान व प्राणिसंग्रहालय जनतेसाठी खुले राहील, तर त्याच्या दुसऱ्या दिवशी बंद ठेवण्यात येईल. या ठरावानुसार बुधवार, २७ ऑगस्ट रोजी वीरमाता जिजाबाई भोसले वनस्पती उद्यान आणि प्राणिसंग्रहालय जनतेसाठी खुले राहणार आहे, असे महानगरपालिका प्रशासनाकडून सांगण्यात आले आहे.