ब्युटी पार्लरमध्ये चालणारे शरीरविक्रयाचे रॅकेट कांदिवली पोलिसांनी उद्ध्वस्त केले असून तीन मुलींची सुटका केली आहे. या प्रकरणी दोन आरोपींना पोलिसांनी अटक केली आहे. कांदिवली पश्चिमेच्या इराणी रोड क्रमांक ३ वरील चॉईस ब्युटी पार्लरमध्ये देहविक्रीचा व्यवसाय चालत असल्याची माहिती परिमंडळ ११ चे पोलीस उपायुक्त बालसिंग राजपूत यांना मिळाली होती. त्यांनी याप्रकरणी कांदिवली पोलिसांचे पथक पाठवले होते. पोलिसांनी बनावट गिऱ्हाईक पाठवून छापा घातला. या कारवाईत पोलिसांनी तीन मुलींची सुटका करून त्यांना सुधारगृहात पाठवले. हे सेक्स रॅकेट चालवणाऱ्या मालवणीत राहणाऱ्या नसरीन शेख (३२) आणि शब्बीर शेख (२१) यांना अटक करण्यात आली आहे.