नागपूर : उपमुख्यमंत्री देवेंद्र फडणवीस यांनी भगवान शंकरावर ‘देवाधी देव’ हे शिवगीत लिहिले असून ज्येष्ठ गायक व संगीतकार शंकर महादेवन आणि अमृता फडणवीस यांनी त्या गाण्याला स्वरबद्ध केले आहे. महाशिवरात्रीच्या मुहूर्तावर या गीताचे लोकार्पण करण्यात आले. लोकसभा निवडणुकीनिमित्त राज्यात राजकीय धामधूम सुरू असतानाही उपमुख्यमंत्री देवेंद्र फडणवीस यांनी हे शिवगीत लिहून काढले. ते आता लोकप्रिय होऊ लागले आहे. देवेंद्र फडणवीस यांनी ट्विटद्वारे या गीताची माहिती दिली.
महाशिवरात्रीच्या निमित्ताने माझ्याकडून ‘देवाधी देव’ हे गीत भगवान शिवाला अर्पण केलेला खास प्रसाद आहे. ज्येष्ठ गायक शंकर महादेवन आणि अमृता फडणवीस यांचे सूर छान जुळून आले आहेत. भगवान शिवशंकर यांच्याबद्दलच्या स्तुती आणि भक्तीचे शब्द यात आहेत.
हेही वाचा…नागपूर, रामटेक मतदारसंघांवरून महायुती आणि महाविकास आघाडीत घोळ सुरूच
काही दिवसापूर्वी अयोध्येत प्रभू रामचंद्राचा प्राणप्रतिष्ठा सोहळा असताना देवेंद्र फडणवीस यांनी बडकस चौक येथील कार्यक्रमात राम जन्मभूमी आंदोलनाच्या विविध कार्यक्रमातून गायले जाणारे जागो तो हिंदू जागो तो… एक बार जागो जागो जागो तो… हे गीत सादर करत युवकामध्ये जोश निर्माण केला होता. हे गीत लोकप्रिय झाले होते. आता प्रभू रामचंद्राच्या गीतानंतर शिवगीत लोकप्रिय होत आहे.