नागपुरात डॉक्टरांनाही डेंग्यू, चिकनगुनियाचा विळखा

नागपुरातील मेडिकल आणि मेयो या दोन्ही शासकीय वैद्यकीय महाविद्यालय व रुग्णालयात माध्यभारतातील अत्यवस्थ रुग्ण उपचाराला येतात. त्यांच्यावर उपचार करणाऱ्या येथील डॉक्टरांसह शहरातील खासगी रुग्णालयांतही डॉक्टर व इतर आरोग्य कर्मचाऱ्यांना ही डेंग्यू,चिकनगुनिया आजारांनी त्रस्त केले आहे. गेल्या दोन ते अडीच महिन्यात मेडिकलच्या सुमारे ६५ निवासी डॉक्टरांमध्ये डेंग्यू तर सुमारे ४५ रुग्णांना चिकनगुनिया सदृश आजाराचे निदान झाले. मेयोतही सुमारे ८ रुग्ण या दोन्ही आजाराच्या लक्षणांनी ग्रस्त होते. जास्तच त्रास असलेल्यांना रुग्णालयात दाखल करण्यात आले. सध्या मेडिकलच्या वार्डात एका निवासी डॉक्टरवर उपचार सुरू आहेत. मेडिकलमध्ये रुग्ण वाढल्याच्या वृत्ताला मार्डचे राज्य कोषाध्यक्ष डॉ. शुभम महल्ले यांनी दुजोरा दिला.

हेही वाचा…करदात्यांचे पैसे मोफत का वाटत आहात? उच्च न्यायालयात याचिका….

झुडपांमुळे डास वाढले

मेडिकल परिसरात मोठ्या प्रमाणात झुडपे आहेत. यात पाणीही साचते. त्यामुळे येथे डासांची संख्या जास्त आहे. महापालिकेकडून अधून-मधून कीटकनाशक फवारणी होते. परंतु ती नियमित व्हावी, अशी मागणी निवासी डॉक्टरांकडून केली जात आहे. दरम्यान काही दिवसांपूर्वीच निवासी डॉक्टरांनी कोलकाता येथील डॉक्टर तरुणीवर अत्याचार व हत्या प्रकरणानंतर डॉक्टरांच्या सुरक्षसह इतर मुद्यांवर संप केला होता. त्यामुळे ही मागणी कधी पूर्ण होणार, याकडे आता सर्व निवासी डॉक्टरांचे लक्ष लागले आहे.

“मेडिकलमध्ये सध्या डेंग्यूचे निदान झालेल्या एका निवासी डॉक्टरवर उपचार सुरू आहेत. काही डॉक्टर डेंग्यू, चिकनगुनियातून बरे झाले आहेत. महापालिकेच्या आरोग्य विभागासोबत मिळून कीटकनाशक फवारणी केली जात असून डास नियंत्रणात आहेत.” – डॉ. अविनाश गावंडे, वैद्यकीय अधीक्षक, मेडिकल.

हेही वाचा…उच्च न्यायालयाच्या न्यायमूर्तींचा समृद्धी महामार्गावरून प्रवास, अधिकाऱ्यांच्या दाव्याची पोलखोल….

नागपुरातील डेंग्यू आणि चिकणगुणियाची स्थिती

नागपूरच्या शहरी भागात १ जानेवारी ते २७ ऑगस्ट २०२४ दरम्यानच्या काळात डेंग्यूचे १०४ तर चिकनगुनियाचे तब्बल ३८६ रुग्ण नोंदवले गेले. त्यापैकी सर्वाधिक रुग्णांची नोंद ऑगस्ट महिन्याच्या २७ दिवसांमध्ये केली गेली. ऑगस्ट महिन्यात शहरात डेंग्यूचे तब्बल ५३ तर चिकनगुनियाचे २६८ रुग्ण नोंदवले गेले. दरम्यान आजार नियंत्रणासाठी महापालिकेच्या आरोग्य विभागाकडून शहरात तापाच्या रुग्णांची तपासणी केली जात आहे. त्याअंतर्गत आरोग्य विभागाचे पथक घरोघरी जाऊन पाणी साठवलेल्या जागांची पाहणी करत आहेत. त्यात हजारो घरांमध्ये डेंग्यूच्या डास अळ्या आढळत असून त्या नष्ट केल्या जात आहे.

हेही वाचा…लोकजागर: पूजा खेडकर ते शुभम गुप्ता!

२०२४ मधील स्थिती

महिना            डेंग्यू चिकनगुनिया

जानेवारी ००             ००

फेब्रुवारी ०६             ००

मार्च             ०२             ००

एप्रिल            ०१             ००

मे             ०४             ००

जून             ०८             ३०

जुलै             ३०             ८८

ऑगस्ट- २६ ५३             २६८

एकूण १०४             ३६८