नाशिक – राज्यातील महायुती सरकारमधील राष्ट्रवादीचे (अजित पवार) मंत्री माणिक कोकाटे हे कायमच चर्चेत असते. कधी आपल्या वागणुकीने तर कधी वेगवेगळ्या घोषणांनी ते लक्ष वेधून घेतात. नाशिक येथे १९ वर्षाआतील शालेय राज्यस्तरीय खो खो स्पर्धेच्या उद्घाटनप्रसंगी क्रीडामंत्री माणिक कोकाटे यांनी पुन्हा एक नवीन घोषणा केली.
राज्यातील आठ विभागातील २७५ खेळाडू आणि २५ अधिकारी या स्पर्धेसाठी उपस्थित आहेत. खेळाडूंना मार्गदर्शन करताना क्रीडामंत्री कोकाटे यांनी, नाशिक जिल्हा खो खो संघटना आणि स्व. सौ. सुरेखाताई भोसले निवासी खो खो प्रबोधिनीचे विशेष कौतुक करताना शासन त्यांच्या पाठीशी भरभक्कम उभे राहील, याची ग्वाही दिली.
शालेय जीवनापासून खेळांची आवड असलेल्या विद्यार्थी खेळाडूंनी आपले नैपूण्य दाखवत यश संपादन केल्यास त्यांना भविष्यात विविध क्षेत्रात अनेक संधी उपलब्ध आहेत. त्यामुळे खेळाडूंनी सांघिक व समर्पित भावनेतून पुढे जात यशस्वी व्हावे. देशी खेळांना अधिक प्राधान्य देण्यासाठी सदैव कटिबद्ध आहे. खेळाडूंना आवश्यक सेवा-सुविधा उपलब्ध करून देण्यात येतील. मैदानी खेळांबरोबरच इनडोअर खेळांसाठी क्रीडागृह उभारणे आवश्यक आहे. क्रीडा विभागाने यासाठीचा प्रस्ताव तयार करून सादर करावा. तसेच नाशिक येथील खेळाडूंच्या वसतिगृहाच्या दुरूस्तीसाठी आराखडा तयार करून प्रस्ताव सादर करण्याच्या सूचना ॲड. कोकाटे यांनी दिल्या.
महाराष्ट्र राज्यातील पहिले खो खो इनडोअर स्टेडियम नाशिकमध्ये. करण्यात येईल, अशी घोषणा कोकाटे यांनी केली. खो खो संघटनेच्या माध्यमातून खेळाडूंना निवासी प्रशिक्षण दिले जाते आणि त्यातून उत्तम खेळाडू तयार होत आहेत, ही बाब कौतुकास्पद आहे. खेळाडूंनी चांगला सराव व उत्तम खेळातून पुढे जात आंतरराष्ट्रीय व जागतिक पातळीवरील खेळांत सहभाग नोंदवून देशाचे नाव उज्ज्वल करावे, अशा शुभेच्छा मंत्री ॲड. कोकाटे यांनी खेळाडूंना दिल्या.
विभागीय क्रीडा संकुल येथे आयोजित शालेय राज्यस्तरीय खो-खो स्पर्धेच्या उद्घाटन प्रसंगी उपविभागीय अधिकारी अर्पिता ठुबे, क्रीडा व युवक सेवा उपसंचालक स्नेहल साळुंखे, जिल्हा क्रीडा अधिकारी सुनंदा पाटील, शिवछत्रपती पुरस्कार्थी अशोक दुधारे, जिल्हा क्रीडा अधिकारी (जळगाव) तथा विशेष कार्यकारी अधिकारी रवींद्र नाईक, ऑलिम्पियन दत्तू भोकनळ, आंतरराष्ट्रीय खेळाडू आकाश शिंदे, तालुका क्रीडा अधिकारी संजीवनी जाधव, अविनाश टिळे, सर्वेश देशमुख, शिवप्रसाद घोडके, निवड समिती सदस्य राजेंद्र साप्ते, श्वेता गवळी, निकिता पवार, प्रिती करवा, दिगंबर वेरणेकर, महेश पलांडे, आंतरराष्ट्रीय खेळाडू भूमिका नेहते, रेश्मा राठोड, नाशिक जिल्हा खो खो संघटनेचे मंदार देशमुख, उमेश आटवणे, नाशिक सायकलिस्ट फाउंडेशनचे राजेंद्र वानखेडे यांच्यासह क्रीडा अधिकारी, क्रीडा शिक्षक व स्पर्धक विद्यार्थी उपस्थित होते.
या स्पर्धेतील प्रथम, द्वितीय व तृतीय क्रमांक संपादन करणाऱ्या संघास अनुक्रमे रूपये पाच हजार, तीन हजार आणि दोन हजार रुपये रोख व पारितोषिक नाशिक जिल्हा खो-खो संघटना आणि स्व. सुरेखाताई भोसले निवासी खो खो प्रबोधिनीच्या वतीने दिले जाणार आहेत. यासह स्पर्धेत उत्कृष्ट प्रदर्शन करणाऱ्या खेळाडूंचाही सत्कार करण्यात येणारअसल्याचे उपसंचालक साळुंखे यांनी प्रास्ताविकात सांगितले.