गिधाड संवर्धन केंद्राच्या बांधकामात निकृष्टपणा, ग्रामस्थांची नाराजी

अंजनेरी येथे सुरू असलेल्या गिधाड संवर्धन केंद्रात करण्यात येणाऱ्या कामांचे नियोजनही होत आहे. गिधाडांची अंडी उबवणे, पिल्लांची निर्मिती आणि त्याची वाढ करून त्यांना निसर्गाच्या सानिध्यात सोडणे, वेगवेगळ्या कारणांमुळे जखमी गिधाडांवर औषधोपचार करणे, आदी कामे या केंद्रात करण्याचे निश्चित झाले. सद्यस्थितीत अंजनेरी या ठिकाणी पाच प्रकारची गिधाडे आढळून येत असून काही गिधाडे ही हिमालयातून काही काळापुरती स्थलांतर करुन येत असतात. शिणी, आरएएस, पांढऱ्या पाठीचे गिधाड, लाल चोचीचे शिरोपिया शिंपी, इंडियन व्हाल्चर, युवसाइन गिफेन इत्यादी गिधाडे आढळून येतात.

हेही वाचा : नववर्ष स्वागतासाठी पर्यटकांची गर्दी ; हॉटेल, लॉजसह रिसॉटमध्ये नोंदणी पूर्ण

अडीच एकर जमिनीवर काम

सरकारकडून गिधाड संवर्धन केंद्रासाठी आठ कोटीचा निधी प्राप्त झाल्यानंतर अंजनेरी परिसरातील मोहिमेवाडी आणि शिंदेवाडीजवळील जंगलात गिधाड संवर्धन केंद्राचे काम सुरू करण्यात आले. त्यासाठी वनविभागाने अडीच एकर जमीन दिली आहे. या कामाच्या पायाभरणीवेळी मुरूम आणि बांधकामावर पाणी मारणे आवश्यक होते. परंतु, फारसे पाणी मारण्यात आलेले नाही. मुरूम किंवा बारीक खडी टाकलेली नसून मोठ्या प्रमाणात माती टाकण्यात आली आहे. त्यामुळे नाशिकच्या सार्वजनिक बांधकाम विभागावर पर्यावरणप्रेमींनी नाराजी व्यक्त केली आहे. या कामावर देखरेख तसेच दर्जा राखण्यासाठी प्रशासन कमकुवत ठरत असल्याची तक्रार ग्रामस्थांनी केली आहे.