जळगाव : जिल्ह्यातील भडगावात एका चहाच्या हॉटेलमध्ये रविवारी अचानक फ्रिजच्या कॉम्प्रेसरचा स्फोट झाल्याने आगीचा भडका उडाल्याचे सांगितले जात होते. ज्यामुळे हॉटेल मालकासह १३ जण जखमी झाले. प्रत्यक्षात, तपासातून हॉटेलमध्ये आगीचा भडका उडाल्याचे वेगळेच कारण समोर आल्याने पोलीस यंत्रणा देखील चक्रावली आहे.
भडगाव येथे बसस्थानक परिसरातील हॉटेलमध्ये चहा पिण्यासाठी ग्राहकांची गर्दी झाली असता, त्याचवेळी अचानक मोठ्या स्फोटासारखा आवाज झाला. प्राथमिक अंदाजानुसार, हॉटेलमधील फ्रिजच्या कॉम्प्रेजरचा स्फोट झाल्यामुळे ही घटना घडल्याची चर्चा होती. आगीचा भडका उडाल्याने जखमी झालेल्यांना तातडीने भडगाव ग्रामीण रुग्णालयात दाखल करण्यात आल्यानंतर वैद्यकीय अधिकाऱ्यांनी त्यांच्यावर प्राथमिक उपचार केले.
मात्र, काहींची प्रकृती जास्त चिंताजनक असल्याने त्यांना पुढील उपचारासाठी पाचोरा, जळगाव तसेच धुळे येथील खासगी आणि शासकीय रुग्णालयात हलविण्यात आले. रुग्णवाहिका चालक निळू पाटील, भैया पाटील, सागर पाटील व गोलू शिंदे यांनी पुढाकार घेत जखमींना वेळीच रुग्णालयात पोहोचवले. त्यांच्या तत्परतेमुळे अनेकांचे प्राण वाचल्याचे नातेवाईकांनी सांगितले.
बसस्थानक परिसरात दिवसभर मोठी वर्दळ असलेल्या पारोळा चौफुलीवर झालेल्या स्फोटामुळे परिसरातील नागरिकांमध्ये भीतीचे वातावरण पसरले होते. हॉटेलवर चहाच्या पिण्यासाठी बरेच जण थांबले असतानाच फ्रिजच्या कॉम्प्रेसरचा अचानक स्फोट झाल्याने आगीचा भडका उडाला. त्यात हॉटेल मालकासह त्यांचा मुलगा व इतर ग्राहक होरपळले.
स्फोट झाल्याचा मोठा आवाज ऐकून आजुबाजुच्या घरांमधील नागरिक भीतीपोटी घराबाहेर पळाले होते, अशी माहिती प्रत्यक्षदर्शींनी दिली. पोलीस निरीक्षक महेश वर्मा यांच्या मार्गदर्शनाखाली पोलिसांनी घटनास्थळी धाव घेऊन स्फोटाचे कारण शोधण्यास सुरूवात केली. त्यातून अतिशय धक्कादायक माहिती समोर आली. प्राथमिक अंदाजानुसार, हॉटेलमधील फ्रिजच्या कॉम्प्रेसरने पेट घेतल्यामुळे हा स्फोट झाल्याचे सांगितले जात होते.
परंतु, पोलिसांनी तपास केला असता हॉटेल मालकाच्या मुलाने संपलेले सिलिंडर बदलल्यानंतर गॅस गळती सुरू झाली. आणि आगीचा भडका उडाला. आगीत हॉटेल मालकासह त्यांचा मुलगा व इतर ग्राहक मिळून १३ जण जखमी झाले. पैकी हॉटेल मालकाच्या मुलाची प्रकृती चिंताजनक असून, त्याच्यावर धुळ्यात एका खासगी रूग्णालयात उपचार सुरू आहेत. इतर जखमींची प्रकृती आता स्थिर आहे.
या प्रकरणी हॉटेल मालकासह त्यांच्या मुलाच्या विरोधात ज्वलनशील पदार्थ हाताळताना निष्काळजीपणा केल्याच्या आरोपावरून पोलिसांनी गुन्हा दाखल केला आहे. सिलिंडरमधून गळती सुरू झाल्यानंतर छोट्या जागेत असलेल्या हॉटेलमधून गॅस बाहेर पडण्यास पुरेशी जागा मिळाली नाही. त्यामुळे आगीने क्षणात रौद्ररूप धारण केल्याची माहिती पोलीस निरीक्षक महेश वर्मा यांनी ‘लोकसत्ता’ला दिली.