नाशिक : सशक्त पिढी तयार करण्यासाठी त्याची सुरुवात मातेच्या गर्भधारणेपासून होणे आवश्यक आहे. गरोदरपणाच्या काळात प्रत्येक मातेला चौरस आहार मिळणे, तिच्या आरोग्याची नियमित तपासणी होणे आवश्यक आहे. तसेच अतिजोखमीच्या मातांचा शोध घेऊन त्यांना गरोदरपणात लागणाऱ्या आरोग्याच्या सर्व सोयीसुविधा उपलब्ध करून देण्यासाठी आरोग्य विभाग प्रयत्न करत असल्याचे केंद्रीय आरोग्य राज्यमंत्री डॉ. भारती पवार यांनी सांगितले.
जिल्ह्यातील ७५ आरोग्य केंद्रांवर गरोदर मातांच्या तपासणी शिबिरांचे आयोजन करण्यात आले आहे. या शिबिरांचा आरंभ चांदवड उपजिल्हा रुग्णालयात डॉ. भारती पवार यांच्या हस्ते दूरदृष्यप्रणालीद्वारे करण्यात आला. त्यावेळी त्यांनी मार्गदर्शन केले. केंद्र आणि राज्य शासनाच्या वतीने मातांना सुरक्षा तसेच सुरक्षित मातृत्व देण्यासाठी अनेकविध योजना राबविण्यात येत असल्याचेही डॉ. पवार यांनी सांगितले. गरोदर मातांची नोंदणी, पंतप्रधान मातृ वंदना योजना, जननी सुरक्षा योजना, नियमित लसीकरण अशा अनेक योजनांच्या माध्यमातून मातांना आरोग्यविषयक आवश्यक सुविधांचा लाभ उपलब्ध करून देण्यात येत असल्याने माता आणि बाल मृत्यूचे प्रमाण कमी होण्यास मदत होत आहे. मानवतेच्या दृष्टिकोनातून आरोग्य सेवा जोडली जावी, यासाठी पंतप्रधान नरेंद्र मोदी यांच्या मार्गदर्शनाखाली विशेष प्रयत्न करण्यात येत आहेत. मातेचे आरोग्य निरोगी असणे महत्त्वाचे आहे. निरोगी मातृत्वातून सशक्त भारताचे भविष्य घडणार आहे, सर्व आरोग्य यंत्रणांच्या मदतीने आयोजित करण्यात आलेले हे शिबीर मानवतेचा संदेश देणारे आहे. यापुढेही आधुनिक तंत्रज्ञानाच्या माध्यमातून रुग्णांपर्यंत सहजतेने पोहचून त्यांना रुग्णसेवा, औषधोपचार पुरविण्यासाठी प्रयत्न करण्यात यावा, अशी सूचना डॉ. पवार यांनी केली. भारतीय संस्कृतीत मातेला सर्वोच्च स्थान असल्याने गर्भवती तसेच मातांच्या आरोग्याची काळजी घेण्यासाठी सर्वानी पुढाकार घेणे आवश्यक आहे, असे आवाहनही डॉ. पवार यांनी केले.
जिल्हा परिषदेच्या मुख्य कार्यकारी अधिकारी लीना बनसोड यांनी दूरदृष्यप्रणालीद्वारे माहिती दिली. गरोदरपणात महिलेला सकस आहार तसेच आरोग्य सुविधा मिळाल्यास जन्मत: कुपोषित असणाऱ्या बालकांचे प्रमाण कमी होईल, त्या दृष्टीने जिल्ह्यातील सर्व आरोग्य केंद्रांवर आवश्यक सुविधा उपलब्ध करून देण्याचा प्रयत्न आरोग्य यंत्रणेमार्फत करण्यात येत असल्याचे सांगितले. या कार्यक्रमास आरोग्य उपसंचालक डॉ. रघुनाथ भोये, जिल्हा शल्यचिकित्सक डॉ. अशोक थोरात, जिल्हा आरोग्य अधिकारी डॉ. कपिल आहेर, अतिरिक्त जिल्हा आरोग्य अधिकारी डॉ. युवराज देवरे, निवासी वैद्यकीय अधिकारी डॉ. सुनील राठोड, वैद्यकीय अधिकारी डॉ. अनंत पवार, चांदवड उपजिल्हा रुग्णालयाचे वैद्यकीय अधीक्षक डॉ. सुशीलकुमार शिंदे आदी उपस्थित होते.