नाशिक – सूत्रसंचालकांनी माझा परिचय करून देतांना मी आजवर मंत्री म्हणून कोणकोणती पदे भुषविली आहेत याची माहिती दिली. हा परिचय सुरू असतांना मला भीती वाटली की, या सांगतील हे उच्चशिक्षण मंत्री असतांना गोहाटीला गेले. आणि तेथून उद्योग मंत्री, मराठी राजभाषा मंत्री म्हणून आले. पण मी गोहाटीला गेलो नसतो तर मराठी भाषेचा मंत्री झालोच नसतो, असे प्रतिपादन उद्योग मंत्री तसेच मराठी भाषा मंत्री उदय सामंत यांनी केले.
येथील सार्वजनिक वाचनालय नाशिक आणि शिक्षक गौरव समितीच्या वतीने आयोजित शिक्षक गौरव सोहळ्यात सामंत यांनी उपस्थितांशी संवाद साधला. यावेळी वाचनालयाचे अध्यक्ष प्रा. दिलीप फडके व अन्य पदाधिकारी उपस्थित होते. सामंत म्हणाले, मी मराठी मंत्री आहे. राज्यमंत्री नसून आंतरराष्ट्रीय मंत्री आहे. कारण मराठी भाषेचे बृहन्मंडळे वेगवेगळ्या ठिकाणी आहेत. मराठी भाषा सातासमुद्रापार पोहचली आहे. उद्योग मंत्री म्हणून कोणी विचारत नाही. परंतु, मराठी भाषा मंत्री म्हणून सगळे बोलवतात. मला मराठी भाषा मंत्री असल्याचा आनंद वाटतो. मंत्री म्हणून मराठी भाषेला अभिजात भाषेचा दर्जा मिळालेला असतांना मराठी भाषा भवन, अद्यावत विश्वकोष असे विविध उपक्रम राज्य शासनाकडून हाती घेण्यात आले आहेत.
मी मराठी भाषेचा मंत्री असलो तरी मराठी, हिंदी, इंग्रजी या तिन्ही भाषा मला येतात. त्या किती येतात, याची कोणी परीक्षा घेऊ नये. इंग्रजी खुप येत नाही. परंतु, कोणाचे नुकसान होणार नाही, एवढी नक्की येते. वाचनालयाच्या विविध उपक्रमांचे कौतुक करतांना वाचनालयाच्या मराठी भाषा वाढीसाठी राबवण्यात येणाऱ्या विविध उपक्रमांना राज्य शासन सहकार्य करेल. शतकोत्तर वाटचाल केलेल्या नाशिक सार्वजनिक वाचनालयाने अन्य ग्रंथालयांचे दायित्व स्वीकारले पाहिजे. राज्यातील अनेक ग्रंथालयांना अशा पालकत्वाची गरज आहे. ग्रंथालये ही सार्वजनिक वाचनालय नाशिकसारखे विविध उपक्रम राबविणारी हवीत, असे सामंत यांनी सांगितले.
सार्वजनिक वाचनालय नाशिकच्या वतीने साहित्य संमेलनासाठी पाच लाखांची मदत मागण्यात आली. आपण १० लाख देण्यात तयार आहोत. वाचनालयाने पाच लाखांत साहित्य संमेलन करावे. अन्य पाच लाखांत ग्रामीण साहित्यिकांना व्यासपीठावर आणून त्यांचा सत्कार करावा, अशी अपेक्षा मंत्री उदय सामंत यांनी व्यक्त केली. वाचनालयाच्या विविध उपक्रमांसाठी शासनाचे सहकार्य राहील, असेही त्यांनी सांगितले.