नवी मुंबई : वाशीत राहणाऱ्या महिलेस सोने दुप्पट करून घेण्याचे आमिष दाखवून उरण येथील एका व्यक्तीने ८ लाखांचे सोने हडप केल्या प्रकरणी गुन्हा दाखल करण्यात आला आहे. मी देवाची खूप भक्ती करतो मला सोने दुप्पट करता येते अशी थाप मारून सोने घेण्यात आले होते.
आजही शिक्षित समाजात अंधश्रद्धा बाळगल्या जातात. याचाच गैर फायदा घेत त्यांची विविध मार्गांनी फसवणूक केली जाते. सोने दुप्पट करून देणे, नोकरी लावून देणे, विवाह इच्छुक लोकांचे विवाह जुळवणे, मूल होत नसेल तर उपाय मिळेल अशा थापा मारून फसवणूक केली जात असल्याचे प्रकार होत असतात. अशा जाहिरात बस ट्रेन लोकलच्या डब्यात हमखास चिटकवलेल्या दिसून येतात अवश्य संपर्क करा म्हणून दोन तीन फोन नंबर हि दिले जातात. अशांना भुलून अनेक जण आपली फसवणूक करून घेतात.
असाच प्रकार वाशीत समोर आला असून सोने दुप्पट करून देतो अशी थाप मारून ८ लाख ५५ हजार रुपयाचे सोने घेतले गेले. या प्रकरणी वाशी पोलीस ठाण्यात गुन्हाही नोंद करण्यात आला आहे.
दीपक पाटील असे यातील संशयित आरोपीचे नाव असून उरण मधील आदिवासी वाडी येथे तो राहतो. त्याचा वाशीत राहणाऱ्या एका महिलेशी संपर्क आला. त्याने या महिलेला समाज माध्यमातून वारंवार धार्मिक भाषा वापरून विश्वास संपादन केला. मी देवाची खूप भक्ती करतो देव प्रसन्न आहे. अशा थापा मारल्या. आपल्यावर विश्वास बसला अशी जेव्हा संशयित आरोपी पाटील याची खात्री झाली त्यावेळी त्याने सोने दुप्पट करण्याची कला आहे. असेही सांगितले.
यावर विश्वास बसल्याने फिर्यादी महिलेने त्याच्या कडे २ लाख ७० हजार किमतीचा ३ टोळ्यांच्या बांगड्या, पाच तोळे वजनाचा ४ लाख ६० हजार किमतीचा सोन्याचा राणी हार तसेच सव्वा लाखांचे दीड तोळे वजनाचे कानातील असे एकूण ८ लाख ५५ हजार रुपये किमतीचे दागिने दिले. मात्र अनेक दिवस उलटूनही सोने दुप्पट करून दिले नाहीच शिवाय दिलेले सोनेही पाटील याने परत केले नाही याबाबत वारंवार मागूनही सोने दिले नाहीत. हा सर्व प्रकार १७ ऑक्टोबर २०२३ ते १ ऑक्टोबर २०२५ दरम्यान घडला.
आपली फसवणूक झाली असल्याची खात्री पटल्यावर फिर्यादीने वाशी पोलीस ठाण्यात तक्रार दाखल केली होती.