भाज्यांच्या, घसरत्या किंमतीनंतर गृहिणी आंनदात असल्या तरीही आता लसणीच्या वाढत्या दराने खिशाला कात्री बसत आहे. भाज्यांसह सगळ्याच पदार्थात लसूण वापरला जात असल्याने आता गृहिणींना लसणीच्या तडक्याबाबत हात आखडता घ्यावा लागणार आहे. स्वस्त असलेल्या लसणाच्या दरात प्रतिकिलो १० रुपयांची वाढ झाली असून कमीत कमी ६० रु ते जास्तीत १००रु रुपयांवर विक्री होत आहे.
हेही वाचा- नवी मुंबई : नाल्यातील काळ्या पाण्यामुळे पिरवाडी किनारा काळवंडला
एपीएमसी बाजारात गुजरात आणि मध्यप्रदेशहून लसणीची आवक होत आहे. जुन्या लसणाचा शेवटचा हंगाम असल्याने लसणीची आवक कमी झाली आहे .तसेच उच्चतम प्रतिचा लसूण कमी आणि हलक्या प्रतिचा लसूण अधिक प्रमाणात येत आहे. उच्चतम प्रतीच्या लसणाला जास्त मागणी आहे. त्यामुळे लसणीच्या किंमतीत वाढ झाल्याचे व्यापाऱ्यांनी सांगितले. एपीएमसी बाजारात नेहमी लसणीच्या १५ ते २० गाडय़ांची आवक होते. मात्र सध्या ३ गाडय़ा दाखल होत असून ५४६ क्विंटल आवक झाली आहे. गेल्या काही महिन्यांपासून लसणाचे दर आवाक्यात होते. परंतु एपीएमसी बाजारात आता कांदा-बटाटा पाठोपाठ लसणाचे दर ही वधारण्यास सुरुवात झाली आहे.
हेही वाचा- नवी मुंबईत स्वच्छतेबाबतची मरगळ संपता संपेना…; निर्माल्य कलश भरले; उचलणार कधी ?
सध्या बाजारात हलक्या प्रतिचा लसूण दाखल होत आहे. त्यामध्ये काळवंडलेला , नरम लसूण जास्त आहे. त्यामुळे चांगल्या मालाला मागणी वाढल्याने दरात वाढ झाली आहे. एपीएमसी घाऊक बाजारात सध्या हलका लसुण प्रतिकिलो १०-६०रु तर चांगला लसूण ६०-१००रुपयांवर उपलब्ध आहे. फेब्रुवारी मध्ये नवीन लसुण दाखल होण्यास सुरुवात होईल तोपर्यंत लसणाचे दर चढेच रहाण्याची शक्यता आहे.