कासा: तलासरी तालुक्यात एका अल्पवयीन (१० वर्षे) मुलीवर अत्याचार करून तिचा गळा दाबून हत्या केल्याची खळबळजनक घटना घडली आहे. आरोपीला तलासरी पोलिसांनी १२ तासांत अटक केली आहे.
तलासरी तालुक्यात आरोपी रमेश दुबळा (४५) हा या मुलीच्या शेजारी राहत असून आर्थिक देवाणघेवाणीवरून मुलीच्या कुटुंबीयांशी त्याचे वाद होते असे सांगितले जाते. त्या राग मनात धरून दुबळा याने या मुलीला शाळेत सोडतो असे सांगून दुचाकीवरून वरून तो तिला घेऊन गेला. मात्र मुलीला शाळेत न सोडता तिच्या घराच्या दहा ते पंधरा किलोमीटर लांब गुजरातमध्ये घेऊन गेला. गुजरातमधील भिलाड- संजण रस्त्यावरील जंगलातील झाडाझुडपात त्याने तिच्यावर अत्याचार केला व त्यानंतर गळा दाबून तिची हत्या केली अशी कबुली आरोपीने पोलिसांकडे दिली आहे.
बुधवारी रात्री दहा वाजेच्या सुमारास नातेवाईक, आई-वडिलांनी पोलिसांकडे ती रात्री उशिरापर्यंत घरी आली नसल्याची तक्रार केली होती. पोलिसांनी तातडीने तपास सुरू केला. पोलीस निरीक्षक अजय वसावे यांच्या नेतृत्वाखाली चार पथके तयार केली व शोधमोहीम राबवली. आरोपीने अल्पवयीन मुलीचा बलात्कार करून गळा दाबून हत्या करून प्रेत जंगलात झाडाझुडपात अडचणीच्या ठिकाणी लपवून ठेवले होते. आरोपीविरुद्ध तलासरी पोलीस ठाण्यात गुन्हा दाखल करण्यात आला असून मुलीचा मृतदेह शवविच्छेदनासाठी ग्रामीण रुग्णालयात पाठवण्यात आला आहे.