Loksabha Election 2024 : हातकणंगलेमधील पंचरंगी लढत माने आणि शेट्टींचं गणित बिघडवणार? कोणाचा होईल विजय?

हातकणंगले लोकसभा मतदारसंघातील निवडणूक वेगवेगळी वळणे घेत, आता पंचरंगी लढतीवर पोहोचली आहे. हातकणंगलेत महायुतीकडून शिंवसेनेचे (शिंदे गट) खासदार धैर्यशील माने हे रिंगणात आहेत. स्वाभिमानी शेतकरी संघटनेचे संस्थापक माजी खासदार राजू शेट्टी यांनी धैर्यशील मानेंना आव्हान देत त्यांचा उमेदवारी अर्ज दाखल केला आहे. तर, उद्धव ठाकरे यांनी शिवसेनेची (उबाठा) उमेदवारी शाहूवाडी पन्हाळ्याचे आमदार सत्यजित पाटील सरूडकर यांना जाहीर केली आहे. वंचित बहुजन आघाडीने कोल्हापूर जिल्हा परिषदेचे माजी अध्यक्ष डी. सी. पाटील यांना हातकणंगलेत उमेदवारी दिली आहे. या उमेदवारांची चौरंगी लढत होणार, ही चर्चा होत असतानाच पत्रकार परिषद घेऊन इचलकरंजीचे अपक्ष आमदार प्रकाश आवाडे यांनी हातकणंगले लोकसभा मतदारसंघाची निवडणूक लढवण्याची घोषणा केली. त्यामुळे हातकणंगलेमध्ये पंचरंगी लढत होणार असल्याचे स्पष्ट झाले आहे. धेर्यशील माने विद्यमान खासदार आहेत आणि त्यांच्यामागे महायुतीची ताकद आहे. तर हातकणंगलेमध्ये राजू शेट्टी यांचीही ताकद मोठ्या प्रमाणावर आहे. त्यामुळे ही पंचरंगी लढत मुख्यतः माने आणि शेट्टी यांच गणित बिघडवणार की इतर तीन उमेदवारांपैकी कोणी बाजी मारणार हे निकालानंतरच स्पष्ट होईल. हातकणंगलेमध्ये ७ मे रोजी तिसऱ्या टप्प्यात लोकसभा निवडणुकीचं मतदान होणार आहे.